پاکستان میں ایل پی جی کی درآمد کے لیے عالمی ٹینڈرز جاری، قیمتوں میں کمی متوقع

کراچی میں مسابقتی ایل پی جی پالیسی کے تحت سرکاری توانائی کمپنیوں نے ایل پی جی کی درآمد کے لیے عالمی ٹینڈرز جاری کر دیے ہیں۔ انڈسٹری ذرائع کے مطابق مجموعی طور پر 70 ہزار میٹرک ٹن ایل پی جی درآمد کرنے کا منصوبہ ہے، جس کی درآمدی کھیپ آئندہ دو ہفتوں میں پاکستان پہنچ جائے گی۔

سوئی سدرن کی ذیلی کمپنی ایس ایل ایل نے بین الاقوامی اسپاٹ مارکیٹ سے ایل پی جی کی خریداری کے لیے 20 ہزار اور 50 ہزار میٹرک ٹن کے دو الگ الگ ٹینڈرز جاری کیے ہیں۔ اس کے علاوہ پاکستان اسٹیٹ آئل (پی ایس او)، سوئی سدرن اور پارکو بھی عالمی مارکیٹ سے ایل پی جی درآمد کریں گے۔

انڈسٹری ذرائع کا کہنا ہے کہ موجودہ عالمی نرخوں کے مطابق درآمدی ایل پی جی پاکستان پہنچ کر تقریباً 450 روپے فی کلو پڑنے کا تخمینہ ہے، اور معمولی منافع کے ساتھ یہ صارفین کو تقریباً 460 روپے فی کلو فراہم کی جا سکے گی۔ ملک میں اس وقت ایل پی جی 530 سے 630 روپے فی کلو فروخت ہو رہی ہے، لہٰذا درآمدی ایل پی جی موجودہ مارکیٹ نرخوں سے 70 سے 130 روپے فی کلو سستی دستیاب ہونے کا امکان ہے۔

سرکاری کمپنیوں کو درآمدی ایل پی جی کے نرخ مقرر کرنے کا اختیار دے دیا گیا ہے۔ ذرائع کے مطابق اس اقدام کا مقصد کاروباری منافع کے بجائے مارکیٹ میں مسابقت پیدا کرنا اور قیمتوں کو کم کرنا ہے، جس سے سردیوں میں سپلائی مستحکم ہونے اور قلت کا خدشہ کم ہونے کی توقع ہے۔

تفصیلات کے مطابق پی ایس او نے ایل پی جی کی درآمد کے لیے مجموعی طور پر 44 ہزار میٹرک ٹن کے تین ٹینڈرز جاری کیے ہیں۔ پی ایس او نے 20 ہزار میٹرک ٹن کا پہلا ٹینڈر 6 نومبر کو جاری کیا، جس کی درآمدی کھیپ 15 سے 25 نومبر کے دوران کراچی پہنچے گی۔ دوسرا ٹینڈر بھی 20 ہزار میٹرک ٹن کے لیے جاری کیا گیا ہے، جس کی کھیپ 20 سے 30 نومبر کے دوران کراچی پہنچنے کی توقع ہے۔

اسی طرح پی ایس او نے 4 ہزار میٹرک ٹن ایل پی جی کی اسپاٹ بنیاد پر درآمد کے لیے ٹینڈر جاری کیا ہے، جس کی بولیاں جمع کرانے کی آخری تاریخ 16 نومبر مقرر کی گئی ہے۔ پارکو پرل گیس نے بھی 3 ہزار 500 میٹرک ٹن ایل پی جی درآمد کرنے کا ٹینڈر جاری کیا ہے، جس کی کھیپ 13 سے 15 نومبر کے دوران پورٹ قاسم پہنچے گی۔ پارکو پرل گیس کے ٹینڈر کے تحت غیر ملکی سپلائرز سے پورٹ قاسم کے لیے سی ایف آر بنیاد پر ایل پی جی خریدی جائے گی۔