لاہور فیصل آباد ریلوٹ پر ٹرین سروس 15 نومبر سے بحال ہوگی

پاکستان ریلوے نے لاہور اور فیصل آباد کے درمیان ریلوے سیکشن پر ٹرین آپریشن 15 نومبر سے بحال کرنے کا فیصلہ کیا ہے اور اس حوالے سے باقاعدہ نوٹیفکیشن جاری کر دیا ہے۔ یہ سیکشن گزشتہ عرصے میں سیلابی صورتحال کے باعث متاثر ہو کر بند ہو گیا تھا، جس کے نتیجے میں مسافروں کو متبادل راستوں سے سفر کرنا پڑ رہا تھا۔

ریلوے حکام کے مطابق سیلاب سے متاثرہ مسن کالر اور قلعہ شیخوپورہ کے درمیان ایک نیا ریلوے پل تعمیر کر لیا گیا ہے اور اس نئے پل پر انجن چلا کر کامیاب ٹرائل بھی مکمل کیا جا چکا ہے۔ اسی ٹرائل کی بنیاد پر سیکشن کی مکمل بحالی کا فیصلہ کیا گیا، جبکہ یہ اقدام چیف ایگزیکٹو آفیسر ریلوے حفیظ اللہ کی ہدایت پر عمل میں لایا گیا۔

اسی سلسلے میں قراقرم ایکسپریس 41 اپ اور 42 ڈاؤن کو دوبارہ لاہور فیصل آباد روٹ پر چلایا جائے گا، جبکہ شالیمار ایکسپریس بھی 15 نومبر سے اپنے اصل روٹ پر بحال ہو جائے گی۔ واضح رہے کہ دونوں ٹرینیں فی الوقت عارضی طور پر ساہیوال کے متبادل روٹ سے چلائی جا رہی ہیں، جس سے مسافروں کو لمبا سفر کرنا پڑتا تھا۔

ریلوے حکام کے مطابق اس بحالی سے لاہور اور فیصل آباد کے درمیان سفر کرنے والے مسافروں کو طویل متبادل روٹ کا سامنا نہیں کرنا پڑے گا اور انہیں براہ راست ریلوے سہولت دستیاب ہو گی۔ اس اقدام سے نہ صرف مسافروں کا وقت بچے گا بلکہ ریلوے کے معمول کے آپریشنز بھی مضبوط ہوں گے۔

پاکستان ریلوے نے مسافروں کو ہدایت کی ہے کہ وہ نئی ٹرین ٹائمنگ اور روٹ کے مطابق اپنے سفر کی منصوبہ بندی کریں تاکہ کسی قسم کی دشواری پیش نہ آئے۔ یاد رہے کہ لاہور فیصل آباد سیکشن ملک کے مصروف ترین ریلوے روٹس میں شامل ہے اور اس کی بحالی سے روزانہ سفر کرنے والے ہزاروں مسافروں کو فائدہ پہنچے گا۔