مصنوعی ذہانت اب سوشل میڈیا معلومات سے انتہائی قابلِ یقین جعلی پیغامات تیار کر سکتی ہے

امریکا میں کی گئی ایک نئی تحقیق نے انکشاف کیا ہے کہ مصنوعی ذہانت کے ٹولز سوشل میڈیا پر عوامی طور پر دستیاب معلومات کا استعمال کرتے ہوئے افراد کو نشانہ بنانے والے انتہائی قابلِ یقین جعلی پیغامات تیار کر سکتے ہیں۔ یونیورسٹی آف ٹیکساس، آرلنگٹن اور لوزیانا اسٹیٹ یونیورسٹی کے محققین نے اس عمل کو کانٹیکسچوئل فشنگ کا نام دیا ہے۔

تحقیق کے مطابق اے آئی ماڈلز صارفین کی دلچسپیوں، روزمرہ سرگرمیوں، سفری تجربات، تصاویر اور سماجی تعلقات کا تجزیہ کر کے ذاتی نوعیت کے فشنگ پیغامات بنا سکتے ہیں۔ مثال کے طور پر کسی شخص کو ایسے ہوٹل کی جانب سے خصوصی پیشکش یا کسی کنسرٹ کی اطلاع بھیجی جا سکتی ہے جس میں اس نے پہلے دلچسپی ظاہر کی ہو، جس سے پیغام کا جعلی ہونا پکڑنا مشکل ہو جاتا ہے۔

محققین نے انسٹاگرام کے 200 صارفین کے عوامی اکاؤنٹس کا جائزہ لیا اور پایا کہ ہر صارف کی تقریباً دس پوسٹس بھی ذاتی نوعیت کے جعلی پیغامات تیار کرنے کے لیے کافی معلومات فراہم کر سکتی ہیں۔ اس عمل میں مصنوعی ذہانت کے مختلف ماڈلز کی مدد سے تقریباً اٹھارہ ہزار پیغامات تیار کیے گئے۔

ان پیغامات کو آٹھ پیمانوں پر جانچا گیا جن میں ذاتی معلومات سے مطابقت، قابلِ یقین ہونے کا تاثر، اثر انگیزی اور جذباتی اثرات شامل تھے۔ نتائج کے مطابق ایسے پیغامات روایتی فشنگ حملوں کے مقابلے میں زیادہ حقیقی اور کم مشکوک محسوس ہو سکتے ہیں، جبکہ بعض حفاظتی ٹولز انہیں شناخت کرنے میں بھی ناکام رہے۔

محققین نے خبردار کیا ہے کہ سوشل میڈیا پر عوامی طور پر شیئر کی جانے والی معمول کی معلومات بھی سائبر جرائم پیشہ عناصر کے لیے خطرہ بن سکتی ہیں۔ اس تحقیق کی اہمیت اس بات میں ہے کہ یہ صارفین، ٹیکنالوجی کمپنیوں اور پالیسی سازوں کو آن لائن فراڈ کے بڑھتے ہوئے خطرے سے آگاہ کرتی ہے۔

ماہرین کی جانب سے یہ بھی تجویز کیا گیا ہے کہ صارفین اپنے اکاؤنٹس کی پرائیویسی ترتیبات کا دورانیہ جائزہ لیں، مشکوک لنکس پر کلک کرنے سے گریز کریں اور ایسی معلومات شیئر کرنے میں احتیاط برتیں جو ان کی روزمرہ سرگرمیوں یا سفری منصوبوں کو ظاہر کرتی ہوں۔