بلوچستان میں معدنیات، تیل و گیس کے شعبوں میں سرمایہ کاری کے وسیع مواقع: وزیراعلیٰ سرفراز بگٹی

وزیراعلیٰ بلوچستان سرفراز بگٹی نے کہا ہے کہ صوبے میں ریکوڈک سمیت معدنیات، تیل اور گیس کے شعبوں میں سرمایہ کاری کے وسیع مواقع موجود ہیں۔ انہوں نے یہ بات دو روزہ منرلز انویسٹمنٹ فورم 2026 کے پہلے روز ہونے والے سیشن سے خطاب کرتے ہوئے کہی۔

وزیراعلیٰ نے کہا کہ بلوچستان سرمایہ کاری کے لیے تیار ہے اور صوبے میں سیکیورٹی کے ساتھ تمام ضروری سہولتیں بھی فراہم کی جائیں گی۔ انہوں نے بتایا کہ حکومت نے منرل کوریڈور کے لیے نیا سیکیورٹی ڈویژن قائم کیا ہے، جبکہ ایف سی کا نیا ونگ بھی بنایا جا رہا ہے۔

سرفراز بگٹی نے کہا کہ بلوچستان میں سرخ فیتے کی رکاوٹ نہیں ہوگی اور سرمایہ کاروں کو ون ونڈو آپریشن کی سہولت فراہم کی جائے گی۔ انہوں نے مزید کہا کہ ریکوڈک منصوبے پر 2029 تک کام شروع ہو جائے گا، اور سرونہ میں تیل اور گیس کے ایسے ذخائر موجود ہیں جو سوئی کے ذخائر سے بھی زیادہ ہیں۔

ادھر گورنر خیبرپختونخوا فیصل کریم کنڈی نے کہا ہے کہ سرمایہ کار خیبرپختونخوا میں معدنیات کی تلاش کے لیے سرمایہ کاری کریں، اور پاکستان آنے والے تمام سرمایہ کاروں کو خوش آمدید کہتے ہیں۔ انہوں نے کہا کہ سرمایہ کاروں کو سیکیورٹی فراہم کرنا ہماری سب سے بڑی ترجیح ہے اور انہیں ون ونڈو آپریشن دیا جائے گا۔

انہوں نے کہا کہ خیبرپختونخوا میں کان کنی کا فروغ چاہتے ہیں، سرمایہ کار صوبے میں منرلز کی تلاش میں سرمایہ کاری کریں، جبکہ خیبرپختونخوا گیس کی پیداوار میں دوسرا بڑا صوبہ ہے۔

دریں اثنا وزیراعلیٰ سندھ مراد علی شاہ نے کہا ہے کہ معدنی شعبے کی ترقی سندھ حکومت کی ترجیح ہے۔ واضح رہے کہ وفاقی وزیر اسحاق ڈار نے بھی پاکستان کے معدنی وسائل سے مالا مال ہونے کا ذکر کرتے ہوئے عالمی سرمایہ کاروں کو تمام سہولتیں فراہم کرنے کا یقین دلایا ہے۔