خیبرپختونخوا کے پہاڑی علاقوں میں برفباری، سردی کی شدت میں اضافہ

خیبرپختونخوا کے مختلف علاقوں میں بارش اور برفباری کا سلسلہ جاری ہے، جس کے باعث بالائی علاقوں میں موسم مزید سرد ہو گیا ہے۔ چترال، سوات اور پشاور سمیت صوبے کے متعدد حصوں میں بارش اور برفباری ریکارڈ کی گئی، جبکہ شہریوں نے سردی سے بچاؤ کے لیے گرم ملبوسات کا استعمال شروع کر دیا ہے۔

اپر چترال کے علاقوں تریچ، کھوت، وادی یارخون، لاسپور اور شندور میں مسلسل برفباری ہو رہی ہے۔ اسی طرح مڈک لشٹ، گرم چشمہ، بگوشٹ، گبور، کیار اور سوسوم میں بھی برف پڑ رہی ہے، جبکہ وادی بروغل میں نسبتاً زیادہ برفباری ریکارڈ کی گئی۔ لوئر چترال کی کالاش وادیوں کے بالائی مقامات بھی برف کی سفید چادر اوڑھ چکے ہیں اور لواری ٹنل اور کریم آباد کے بالائی حصوں میں بھی بارش اور برفباری کا سلسلہ جاری ہے۔

سوات کے مرکزی شہر مینگورہ میں ہلکی بارش ہوئی، جبکہ بالائی علاقوں مٹلتان اور مہوڈنڈ میں برفباری ہوئی جس کے بعد موسم مزید سرد ہو گیا۔ سردی کی شدت بڑھنے پر شہریوں نے گرم کپڑے پہننا شروع کر دیے ہیں۔ پشاور میں بھی ہلکی بوندا باندی سے موسم خوشگوار ہو گیا۔

دوسری جانب چترال میں بارش اور برفباری کے باعث سردی بڑھنے سے شہریوں کو جلانے کی لکڑی کے حصول میں دشواری کا سامنا ہے۔ سوختنی لکڑی کی قیمتوں میں نمایاں اضافہ ہوا ہے، جبکہ سلنڈر گیس کی قیمتیں بھی شہریوں کی پہنچ سے باہر ہو گئی ہیں، جس سے عام گھرانوں کو سردی کے موسم میں اضافی مالی بوجھ اٹھانا پڑ رہا ہے۔

ماہرین کے مطابق بالائی علاقوں میں برفباری کے تسلسل سے درجہ حرارت میں مزید کمی کا امکان ہے، اور پہاڑی راستوں پر سفر کرنے والوں کو احتیاط کی ہدایت کی گئی ہے۔ مقامی انتظامیہ کی جانب سے برف ہٹانے اور امدادی کارروائیوں کے لیے تیاریوں کا بتایا گیا ہے تاکہ شہریوں کو نقل و حرکت میں دشواری پیش نہ آئے۔