سندھ میں مینگرووز کے جنگلات کی بحالی کا فیصلہ، وزیراعلیٰ مراد علی شاہ کی موسمیاتی اقدامات تیز کرنے کی ہدایت

وزیراعلیٰ سندھ سید مراد علی شاہ نے موسمیاتی تبدیلی سے نمٹنے کے لیے حکومتی اقدامات کو مزید تیز کرنے اور آئندہ کے خطرات کا مقابلہ کرنے کے قابل بنیادی ڈھانچے کی تعمیر پر زور دیا ہے۔ انہوں نے یہ ہدایات موسمیاتی تبدیلی سے متعلق ایک اعلیٰ سطحی اجلاس کی صدارت کرتے ہوئے دیں، جس میں صوبائی حکومت کے سینئر افسران نے شرکت کی اور جاری منصوبوں کے ساتھ ساتھ مستقبل کی ترجیحات کا جائزہ لیا گیا۔

اجلاس میں فیصلہ کیا گیا کہ سندھ میں مینگرووز کے جنگلات کی بحالی اور ساحلی علاقوں کے قدرتی تحفظ کو مزید وسعت دی جائے گی۔ اس حوالے سے ڈیلٹا بلیو کاربن منصوبے کے تحت ایک لاکھ 26 ہزار ہیکٹر رقبے پر مینگرووز کی بحالی کا جائزہ لیا گیا، جبکہ انڈس ڈیلٹا کے تحفظ اور ساحلی کٹاؤ کو روکنے کے لیے قدرتی حفاظتی نظام مضبوط بنانے پر بھی زور دیا گیا۔

اجلاس میں بارش کے پانی کو ذخیرہ کرنے، آبپاشی کی کارکردگی بہتر بنانے اور آبی وسائل کے مؤثر استعمال پر خصوصی توجہ دی گئی۔ وزیراعلیٰ سندھ نے کہا کہ موسمیاتی تبدیلی سندھ کے لیے محض ماحولیاتی نہیں بلکہ ترقی کا بنیادی مسئلہ ہے، کیونکہ صوبے کو سیلاب، خشک سالی، پانی کی قلت اور ساحلی کٹاؤ جیسے خطرات کا سامنا ہے۔ انہوں نے عوام کی جان و مال، ذرائع معاش اور آبی وسائل کے تحفظ کو حکومت کی اولین ترجیح قرار دیا۔

اجلاس کو بریفنگ میں بتایا گیا کہ صوبے کے 23 اضلاع میں 552 میل طویل نہروں کی بحالی مکمل کی گئی ہے، جس سے 884 کیوسک پانی کی بچت ہوئی ہے۔ مزید یہ کہ سندھ میں مجموعی طور پر 6 لاکھ 50 ہزار ایکڑ فٹ پانی ذخیرہ کرنے کی گنجائش کے 207 چھوٹے ڈیم تعمیر کیے گئے ہیں۔ وزیراعلیٰ نے آبپاشی کے نظام کو بہتر بنانے اور نکاسی آب کے منصوبے جلد مکمل کرنے کی ہدایت بھی دی۔

سندھ کوسٹل ریزیلینس منصوبے کے تحت ٹھٹو، سجاول اور بدین کے 5 لاکھ سے زائد افراد کو تحفظ فراہم کیا جائے گا۔ اجلاس میں ہوا سے 2 ہزار 360 میگاواٹ اضافی بجلی پیدا کرنے کے منصوبوں کا بھی جائزہ لیا گیا، جبکہ کم آمدنی والے اور آف گرڈ 2 لاکھ 75 ہزار گھرانوں کے لیے شمسی توانائی کے منصوبے زیرِ غور ہیں۔ وزیراعلیٰ نے قابلِ تجدید توانائی اور نجی شعبے کی سرمایہ کاری کو فروغ دینے کی ہدایت کی اور متعلقہ محکموں کو ترجیحی منصوبوں پر عمل درآمد تیز کرنے کا حکم دیا۔