بلاول بھٹو کا وزیراعظم کو مشورہ: اتحادیوں کو اعتماد میں لیں، اپوزیشن سے جھگڑا نہ چھیڑیں

پاکستان پیپلز پارٹی کے چیئرمین بلاول بھٹو زرداری نے وزیراعظم کو مشورہ دیا ہے کہ وہ پہلے اپنے اتحادیوں کو اعتماد میں لیں اور اپوزیشن کے ساتھ نئے جھگڑے چھیڑنے کی بجائے افہام و تفہیم سے کام کریں۔ یہ بات انہوں نے وزیراعلیٰ ہاؤس میں سندھ پیپلز ہاؤسنگ فار فلڈ ری ہیبیلیٹیشن کے تحت دس لاکھ گھروں کی تکمیل کی تقریب سے خطاب کرتے ہوئے کہی۔ ان کا کہنا تھا کہ جب تک حکومت اور اپوزیشن مل کر کام نہیں کریں گے، عوام کو ریلیف فراہم کرنا ممکن نہیں ہے۔

بلاول بھٹو زرداری نے کہا کہ اس منصوبے کی شروعات قدرتی آفت کے بعد ہوئی، لیکن اس سے بیروزگاری کے دوران عوام کو معاشی تحفظ بھی ملا۔ انہوں نے کہا کہ عوام اپنی حکومتوں کی طرف تقسیم کی سیاست یا ایک دوسرے سے لڑانے کے لیے نہیں دیکھتے، بلکہ اپنی زندگیاں آسان بنانے کے لیے دیکھتے ہیں۔ ان کے مطابق سندھ حکومت کے گھر بنانے اور مفت علاج کے منصوبے عوام کو ریلیف دینے والے منصوبے ہیں۔

پیپلز پارٹی کے چیئرمین نے بتایا کہ جب عالمی اداروں سے بات کی جا رہی تھی تو وفاقی حکومت کہہ رہی تھی کہ یہ رقم اسے دی جائے کیونکہ صوبائی حکومت نااہل ہے۔ انہوں نے کہا کہ وفاق کا منصوبہ یہ تھا کہ سندھ کے عوام کو بنے بنائے گھر دیے جائیں، لیکن انہیں سندھ کے موسم کا اندازہ نہیں تھا۔ انہوں نے ورلڈ بینک کا شکریہ ادا کیا کہ اس نے سندھ حکومت پر اعتماد کیا۔

انہوں نے موازنہ کرتے ہوئے کہا کہ بلوچستان میں گھر بنانے کی ذمہ داری وفاقی حکومت نے لی جہاں تین سال میں تیس ہزار گھر بنے، جبکہ سندھ حکومت نے اسی مدت میں دس لاکھ گھر مکمل کیے۔ انہوں نے کہا کہ سندھ کو سب سے زیادہ کردار کشی کا سامنا کرنا پڑتا ہے، اور اگر حکومت سندھ پیسہ بنانے کے لیے محنت کر رہی ہوتی تو گھروں کی بجائے کرپشن ہوتی۔ انہوں نے وزیراعلیٰ سندھ کو مشورہ دیا کہ وہ عالمی اداروں کو اس منصوبے کے آڈٹ کی دعوت دیں اور دعوے سے کہا کہ اس منصوبے میں کرپشن نہیں ہوئی۔

بلاول بھٹو نے کہا کہ دس لاکھ گھر بناتے ہوئے دس لاکھ روزگار کے مواقع بھی پیدا ہوئے، اور اب ملک کو ری سیٹ کی ضرورت ہے۔ انہوں نے کہا کہ ملک کو تاجروں اور کاروباری افراد کی بجائے عوام کی مرضی سے چلانا ہوگا۔ انہوں نے وزیراعظم شہباز شریف کا شکریہ ادا کرتے ہوئے کہا کہ انہوں نے کم از کم سندھ کو یہ محسوس نہیں ہونے دیا کہ وفاق اس کے ساتھ نہیں ہے، جبکہ پچھلی حکومت نے سیلاب کے وقت سندھ کو ایک روپیہ بھی نہیں دیا تھا۔

وزیراعلیٰ سندھ سید مراد علی شاہ نے تقریب سے خطاب کرتے ہوئے کہا کہ دس لاکھ گھروں کی تعمیر دنیا کے سب سے بڑے ہاؤسنگ منصوبے کی تکمیل کا تاریخی سنگ میل ہے۔ انہوں نے بتایا کہ سیلاب متاثرین کے لیے تئیس اضلاع میں اکیس لاکھ موسمیاتی اثرات سے محفوظ گھر بنانے کا ہدف ہے، اور تعمیر شدہ ہر گھر جیو ٹیگڈ اور ڈیجیٹل مانیٹرنگ کے ذریعے تصدیق شدہ ہے۔ انہوں نے کہا کہ یہ منصوبہ چیئرمین پیپلز پارٹی کے ویژن اور عالمی بینک کے تعاون سے ایک ناقابل تصور ہدف کو حقیقت میں بدلنے کی مثال ہے۔