ڈی آئی خان میں پولیس اسٹیشن پر بارود بھری گاڑی سے حملہ ناکام، ملزمان فرار

ڈیرہ اسماعیل خان کے علاقے بندکورائی میں دہشت گردوں نے بارود سے بھری گاڑی مقامی پولیس اسٹیشن کے گیٹ سے ٹکرا دی، تاہم پولیس کی بروقت جوابی کارروائی کی بدولت حملہ ناکام بنا دیا گیا۔ پولیس کے مطابق زوردار دھماکے کے نتیجے میں اسٹیشن کا مرکزی گیٹ اور دیوار منہدم ہوگئی۔

حکام کے مطابق دھماکے کی شدت اتنی زیادہ تھی کہ قریب واقع مسجد کی عمارت کو بھی نقصان پہنچا جبکہ آس پاس کے رہائشی مکانات متاثر ہوئے۔ تاہم اس واقعے میں کسی پولیس اہلکار کے زخمی یا شہید ہونے کی اطلاع نہیں ہے اور تمام اہلکار محفوظ رہے۔

پولیس ذرائع نے بتایا کہ حملے کے فوراً بعد اہلکاروں نے جوابی فائرنگ کی جس پر حملہ آور موقع سے فرار ہوگئے۔ ایس پی پھاڑ پور، ڈی ایس پی اور مقامی باشندوں نے بھی ملزمان کا تعاقب کیا، لیکن اندھیرے اور قریبی جنگل کا فائدہ اٹھاتے ہوئے وہ فرار ہونے میں کامیاب رہے۔

واقعے کے بعد پولیس اور سیکیورٹی فورسز نے علاقے میں سرچ آپریشن شروع کر دیا ہے تاکہ فرار ہونے والے ملزمان کا سراغ لگایا جا سکے۔ سیکیورٹی حکام کی جانب سے حالات کا جائزہ لیا جا رہا ہے اور علاقے میں اضافی نفری تعینات کی گئی ہے۔

یاد رہے کہ حالیہ دنوں میں صوبہ خیبر پختونخوا کے مختلف اضلاع میں سیکیورٹی فورسز کی تنصیبات کو نشانہ بنانے کے واقعات سامنے آئے ہیں، جن میں قانون نافذ کرنے والے اداروں کی جانب سے مؤثر جوابی کارروائی کی گئی۔ حکام نے عوام سے اپیل کی ہے کہ وہ کسی بھی مشکوک سرگرمی کی اطلاع فوری طور پر متعلقہ اداروں کو دیں۔

دوسری جانب کوہاٹ میں حالیہ حملے میں شہید ہونے والے دس پولیس اہلکاروں کی نماز جنازہ ادا کر دی گئی ہے، جس میں گورنر خیبر پختونخوا سمیت اعلیٰ حکام نے شرکت کی۔ وزیراعظم نے شہداء کے لواحقین سے دلی ہمدردی اور تعزیت کا اظہار کیا ہے۔