پاکستان منرلز انویسٹمنٹ فورم 2026: معدنی شعبے میں غیر ملکی سرمایہ کاری کے نئے مواقع

پاکستان کے وسیع معدنی ذخائر سے بھرپور استفادے اور عالمی مائننگ کمپنیوں کے لیے نئے مواقع پیدا کرنے کے حوالے سے اسلام آباد میں پاکستان منرلز انویسٹمنٹ فورم 2026 کا انعقاد کیا گیا، جس نے بین الاقوامی سرمایہ کاروں اور تکنیکی ماہرین کی نمایاں توجہ حاصل کی۔ یہ فورم ملکی معدنی وسائل کی ترقی، غیر ملکی سرمایہ کاری اور جدید کان کنی ٹیکنالوجی کے تبادلے کے لیے ایک اہم پلیٹ فارم ثابت ہو رہا ہے۔

فورم کے موقع پر جرمن ادارے کالی اُم ویلٹ ٹیکنِک (کے یو ٹیک) کے ایگزیکٹو ڈائریکٹر ڈاکٹر سیباسشن لوننگ نے کہا کہ پاکستان کے معدنی وسائل سے بھرپور فائدے کے لیے بین الاقوامی تعاون اور جدید تکنیکی مہارت ناگزیر ہے۔ ان کے مطابق کے یو ٹیک معدنی ذخائر کی تلاش، نشاندہی اور جانچ پڑتال میں جدید تکنیکی معاونت فراہم کرنے کے لیے تیار ہے۔

ڈاکٹر سیباسشن لوننگ نے بتایا کہ ادارہ محفوظ اور مؤثر زیرِ زمین کان کنی کے لیے جدید زلزلہ پیما نگرانی اور بیک فل ڈیزائن جیسی سہولیات فراہم کر رہا ہے۔ انہوں نے مزید کہا کہ فورم مقامی شراکت داروں اور بین الاقوامی کمپنیوں کے درمیان مؤثر روابط کو فروغ دینے میں مددگار ہے، جبکہ کے یو ٹیک پاکستان میں کان کنی کے شعبے کی ترقی کے لیے جدید تکنیکی مہارت فراہم کرنے کا خواہاں ہے۔

اس موقع پر لکی سیمنٹ کے چیف ایگزیکٹو آفیسر محمد علی طبہ نے کہا کہ پاکستان معدنی وسائل کی ترقی کے حوالے سے ایک اہم اور امید افزا مرحلے میں داخل ہو چکا ہے۔ انہوں نے اس بات پر زور دیا کہ ملکی معدنی شعبے میں سرمایہ کاری کے لیے سازگار ماحول اور جدید ٹیکنالوجی کا فروغ طویل مدتی ترقی کے لیے ضروری ہے۔

واضح رہے کہ حکومت پاکستان معدنی وسائل کے فروغ، عالمی سرمایہ کاروں کے ساتھ روابط اور جدید ٹیکنالوجی کے تبادلے کے لیے فیصلہ سازی میں مصروف ہے۔ اس کے علاوہ سندھ حکومت نے معدنیات کی تلاش اور برآمد کے لیے ملکی و غیر ملکی سرمایہ کاروں کو دعوت دی ہے، جبکہ خیبر پختونخوا میں بھی معدنیات کے شعبے میں غیر ملکی اور مقامی سرمایہ کاری کے فروغ کے لیے اہم پیش رفت دیکھی جا رہی ہے۔

ماہرین کے مطابق اس فورم کا انعقاد بین الاقوامی سرمایہ کاری اور جدید ٹیکنالوجی کے اشتراک کے روشن امکانات کو اجاگر کرتا ہے، جس سے نہ صرف ملکی معیشت کو تقویت مل سکتی ہے بلکہ کان کنی کے شعبے میں روزگار کے مواقع بھی پیدا ہو سکتے ہیں۔ فورم کے شرکا نے امید ظاہر کی کہ اس طرح کے پلیٹ فارمز سے پاکستان میں معدنی وسائل کی پائیدار ترقی کو فروغ ملے گا۔