پوسٹل لائف انشورنس پنشنرز کی جمع پونجی تاخیر کا معاملہ: اسلام آباد ہائیکورٹ نے فریقین کو نوٹس جاری کر دیے

اسلام آباد ہائیکورٹ نے پوسٹل لائف انشورنس کے پنشنرز، بیواؤں اور سرکاری ملازمین کی جمع پونجی کی ادائیگی میں مبینہ تاخیر کے معاملے پر سیکرٹری وزیراعظم، وزارت مواصلات، وزارت خزانہ، کابینہ ڈویژن اور دیگر متعلقہ فریقین کو نوٹس جاری کرتے ہوئے تحریری جواب طلب کر لیا ہے۔ یہ حکم جسٹس محمد ارباب طاہر کی عدالت نے پوسٹل لائف انشورنس فنڈز سے متعلق دائر درخواست کی سماعت کے دوران دیا۔

سماعت کے موقع پر جوڈیشل ایکٹوزم پینل کی جانب سے وکیل اظہر صدیق عدالت میں پیش ہوئے اور مؤقف اختیار کیا کہ پالیسی ہولڈرز کے تقریباً 48 ارب روپے کہاں گئے، اس کا جواب وفاقی حکومت اور وزارت خزانہ کو دینا ہوگا۔ انہوں نے کہا کہ وفاقی وزیر مواصلات خود تسلیم کر چکے ہیں کہ پالیسی ہولڈرز کی رقم وزارت خزانہ کے پاس موجود ہے۔

درخواست گزار کے وکیل نے عدالت کو بتایا کہ پالیسی ہولڈرز کی رقم وفاقی حکومت کی آمدن نہیں بلکہ ان کے پاس رکھی گئی امانت ہے، اور اس سلسلے میں آئین کے آرٹیکل 78 کا حوالہ بھی دیا گیا۔ درخواست میں استدعا کی گئی ہے کہ پوسٹل لائف انشورنس کے فنڈز کی منتقلی، ان کے استعمال اور موجودہ حیثیت کی مکمل تفصیلات عدالت کے سامنے پیش کی جائیں۔

وکیل نے مزید کہا کہ آڈیٹر جنرل پاکستان کی خصوصی رپورٹ میں پوسٹل لائف انشورنس کی مالی اور انتظامی بے ضابطگیوں کی نشاندہی کی گئی ہے۔ انہوں نے مطالبہ کیا کہ پالیسی ہولڈرز کے واجب الادا کلیمز کی ادائیگی کو یقینی بنانے کے لیے آزادانہ فرانزک آڈٹ کرایا جائے، اور یاد دلایا کہ انشورنس کلیمز 90 روز کے اندر ادا نہ کرنا انشورنس آرڈیننس 2000 کی دفعہ 118 کے تحت ایک قانونی سوال ہے۔

درخواست میں وزارت خزانہ، وزارت مواصلات، پاکستان پوسٹ اور سیکیورٹیز اینڈ ایکسچینج کمیشن آف پاکستان کی ذمہ داریوں کا تعین کرنے کی استدعا کے ساتھ ساتھ وفاقی کابینہ کے فیصلوں، فنڈز کی منتقلی کے احکامات اور ایکچوریل ویلیوایشن کا ریکارڈ بھی عدالت میں پیش کرنے کی درخواست کی گئی ہے۔ عدالت نے تمام فریقین کو نوٹس جاری کرتے ہوئے سماعت ملتوی کر دی اور آئندہ تاریخ کا اعلان بعد میں کیا جائے گا۔

واضح رہے کہ یہ معاملہ سیکڑوں پنشنرز، بیواؤں اور ملازمین کے مالی حقوق سے جڑا ہے، جن کی جمع پونجی کی بروقت ادائیگی نہ ہونے پر انہیں شدید مشکلات کا سامنا ہے۔ عدالت کی جانب سے نوٹس جاری ہونے کے بعد توقع ہے کہ متعلقہ ادارے جلد اپنا موقف پیش کریں گے۔