جونیئر اسکواش اسٹار ماہ نور علی کا انعامی رقم کے لیے وزیراعظم اور فیلڈ مارشل سے انصاف کی اپیل

پشاور سے تعلق رکھنے والی 14 سالہ بین الاقوامی جونیئر اسکواش کھلاڑی ماہ نور علی نے وزیراعظم پاکستان اور فیلڈ مارشل سید عاصم منیر سے انصاف کی اپیل کی ہے۔ ان کا کہنا ہے کہ وہ ایشین جونیئر سپر سیریز میں چار مرتبہ گولڈ میڈل جیت چکی ہیں اور گزشتہ و رواں برس دو مرتبہ ایشین جونیئر چیمپئن شپ کے فائنل تک پہنچی ہیں، لیکن اس کے باوجود انہیں اپنی جائز انعامی رقم نہیں دی گئی۔

ماہ نور علی نے الزام عائد کیا کہ انہوں نے پاکستان اسپورٹس بورڈ اور صدر پاکستان اسپورٹس بورڈ کے دفاتر کے متعدد چکر لگائے لیکن اب تک انہیں ان کا حق نہیں ملا۔ انہوں نے کہا کہ شدید مالی مشکلات کے باعث بین الاقوامی مقابلوں میں پاکستان کی نمائندگی کرنا، سفر اور ٹریننگ کے اخراجات برداشت کرنا بہت مشکل ہوتا جا رہا ہے۔

انہوں نے مطالبہ کیا کہ ان کی جائز انعامی رقم فوری طور پر ادا کرنے کے احکامات جاری کیے جائیں اور مالی معاونت فراہم کی جائے تاکہ وہ پاکستان کے لیے مزید تمغے جیت سکیں۔ ماہ نور علی نے کہا کہ اگر نوجوان کھلاڑیوں کو ان کی محنت کا حق اور حکومتی سرپرستی نہیں ملے گی تو مستقبل میں کون اس کھیل کو اپنائے گا اور پاکستان کے لیے عالمی سطح پر کھیلے گا۔

ان کا کہنا ہے کہ وہ صرف اپنا حق اور ملک کی نمائندگی جاری رکھنے کے لیے تعاون چاہتی ہیں، اور وزیراعظم اور فیلڈ مارشل سے اپیل ہے کہ وہ ان کی آواز سنیں، انہیں ان کا حق دیا جائے اور پاکستان کے ٹیلنٹ کو ضائع ہونے سے بچایا جائے۔