عالمی اور مقامی مارکیٹ میں سونے کی قیمتوں میں بڑی کمی

ملک کی صرافہ مارکیٹوں میں بدھ کے روز سونے اور چاندی کی قیمتوں میں نمایاں کمی دیکھی گئی، جس کی بنیادی وجہ بین الاقوامی مارکیٹ میں قیمتوں کا گرنا ہے۔ تاجروں کے مطابق یہ کمی گزشتہ کچھ عرصے سے جاری نرمی کے رجحان کا تسلسل ہے۔

بین الاقوامی بلین مارکیٹ میں فی اونس سونے کی قیمت 109 ڈالر کی کمی سے 3,940 ڈالر کی سطح پر آ گئی۔ عالمی مارکیٹ کی اس گراوٹ نے مقامی قیمتوں کو بھی متاثر کیا اور صرافہ بازاروں میں سونے کی قیمت میں یکدم بڑی کمی ریکارڈ کی گئی۔

مقامی مارکیٹ میں فی تولہ سونے کی قیمت 10,900 روپے کم ہو کر 4 لاکھ 16 ہزار 536 روپے اور فی دس گرام سونے کی قیمت 9,345 روپے کی کمی سے 3 لاکھ 57 ہزار 112 روپے کی سطح پر آ گئی۔

سونے کے ساتھ چاندی کی قیمتوں میں بھی کمی واقع ہوئی۔ فی تولہ چاندی کی قیمت 190 روپے کم ہو کر 5,578 روپے اور فی دس گرام چاندی کی قیمت 163 روپے کی کمی سے 4,782 روپے پر آ گئی۔

ماہرین کے مطابق سونے کی قیمتوں کا رجحان آئندہ دنوں میں عالمی معاشی اشاروں اور ڈالر کی مضبوطی یا کمزوری پر منحصر رہے گا، جبکہ مقامی سطح پر قیمتیں بین الاقوامی رفتار کے ساتھ ہی تبدیل ہوتی رہیں گی۔