کویت پٹرولیم اور پی ایس او کا گیس آئل اور جیٹ فیول کی فراہمی جاری رکھنے پر اتفاق

کویت پیٹرولیم کارپوریشن (کے پی سی) اور پاکستان اسٹیٹ آئل (پی ایس او) نے گیس آئل اور جیٹ فیول کی خریداری کا سلسلہ جاری رکھنے پر اتفاق کیا ہے۔ یہ اتفاق پی ایس او کے ایک وفد کے کویت کے دورے کے دوران کے پی سی کی اعلیٰ قیادت سے ملاقات میں سامنے آیا، جس میں موجودہ مارکیٹ صورتحال کے مطابق شرائط کو مزید بہتر بنانے پر بھی رضامندی ظاہر کی گئی۔

پی ایس او کے وفد کی قیادت کمپنی کے چیف ایگزیکٹو آفیسر جواد احمد چیمہ نے کی۔ ملاقات میں کے پی سی کے چیف ایگزیکٹو آفیسر اور ڈپٹی چیئرمین شیخ نواف سعود الصباح، کے پی سی کے مینیجنگ ڈائریکٹر انٹرنیشنل مارکیٹنگ اور کویت آئل ٹینکر کمپنی (کے او ٹی سی) کے چیف ایگزیکٹو آفیسر شیخ خالد احمد الصباح بھی موجود تھے۔

دونوں اداروں نے اپنی پچاس سالہ توانائی شراکت داری کی تجدیدِ عزم کرتے ہوئے توانائی کی پوری ویلیو چین میں تعاون کو وسعت دینے اور اسٹریٹجک اشتراک کے نئے مواقع تلاش کرنے کا عزم ظاہر کیا۔ اس سلسلے میں سپلائی، اسٹوریج، شپنگ، ریفائننگ، لبریکنٹس اور سرمایہ کاری کے شعبوں میں باہمی تعاون پر بات چیت کی گئی تاکہ توانائی کے تحفظ اور طویل مدتی ترقی کو فروغ دیا جا سکے۔

مذاکرات میں بیس آئل کی سپلائی اور لبریکنٹس کی مارکیٹنگ کے شعبے میں وسیع تر کاروباری مواقع پر بھی تبادلہ خیال کیا گیا۔ کے پی سی حکومتِ پاکستان کی جانب سے حال ہی میں نظرثانی شدہ کسٹمز بانڈڈ اسٹوریج پالیسی کے تحت پاکستان کی اسٹوریج اور بندرگاہوں کی سہولیات سے استفادہ کرے گا، جہاں سے درآمد شدہ مصنوعات مقامی مارکیٹ میں فروخت اور علاقائی منڈیوں کو دوبارہ برآمد کے لیے استعمال کی جا سکیں گی۔

اس منصوبے پر عمل درآمد کے لیے متعلقہ پاکستانی محکموں اور اداروں سے بقیہ کارروائی اور دستاویزات جلد مکمل ہونے کی توقع ہے۔ دونوں ادارے پاکستان کے توانائی کے شعبے بشمول گیس، کے پی سی کی ممکنہ سرمایہ کاری کے ساتھ ساتھ ریفائننگ، اسٹوریج انفراسٹرکچر، شپنگ اور لاجسٹکس کے شعبوں میں بھی مواقع تلاش کریں گے۔

پی ایس او کے چیف ایگزیکٹو آفیسر جواد احمد چیمہ نے کہا کہ پاکستان کے اسٹوریج اور بندرگاہوں کے بنیادی ڈھانچے میں کے پی سی کی دلچسپی توانائی کے تحفظ کو مضبوط بنانے، علاقائی تجارت کو فروغ دینے اور سرمایہ کاری راغب کرنے کے اہم مواقع فراہم کرتی ہے۔ انہوں نے کہا کہ پی ایس او آئندہ پچاس برسوں کے لیے ان مذاکرات کو ٹھوس عملی نتائج میں تبدیل کرنے کے لیے پرعزم ہے۔