کرسٹیانو رونالڈو کی پہلی ٹی وی سیریز 'ڈے 1s' کی پروڈکشن شروع

پرتگال کے عالمی شہرت یافتہ فٹبالر کرسٹیانو رونالڈو نے فٹبال کے میدان سے باہر ایک نئے سفر کا آغاز کرتے ہوئے اپنی پہلی ٹی وی سیریز 'ڈے 1s' کی پروڈکشن شروع کرنے کا اعلان کیا ہے۔ رونالڈو نے انسٹاگرام پر اس منصوبے کی خبر شیئر کرتے ہوئے بتایا کہ سیریز کی تیاری شروع ہو چکی ہے اور مزید تفصیلات جلد سامنے آئیں گی۔

'ڈے 1s' فٹبال کی دنیا پر مبنی ایک ڈرامہ سیریز ہے جس میں ایک بڑی فٹبال ایجنسی کے کاروباری معاملات، طاقت کی کشمکش، معاہدوں اور باہمی تعلقات کو دکھایا جائے گا۔ اس سیریز میں معروف اداکار ڈیمین لیوس فٹبال ایجنٹ اسٹینلے ڈالٹن کا کردار ادا کریں گے۔

سیریز میں سابق فرانسیسی فٹبالر تھیری ہنری اور برطانوی ریپر ڈیو بھی شامل ہیں۔ توقع ہے کہ ہنری سیریز میں ایک مختصر کردار ادا کریں گے۔ یہ سیریز رونالڈو اور برطانوی فلم ساز میتھیو وان کی قائم کردہ پروڈکشن کمپنی تیار کر رہی ہے، جس کا آغاز 2025 میں کیا گیا تھا۔

رونالڈو اس منصوبے کے ایگزیکٹو پروڈیوسر ہیں اور توقع ہے کہ وہ پہلی مرتبہ کسی اسکرپٹڈ ڈرامے میں بھی اداکاری کریں گے۔ یہ سیریز فٹبال کے شائقین کے لیے دلچسپی کا باعث ہو گی کیونکہ اس میں کھیل کے پس پردہ کاروباری اور انسانی پہلوؤں کو اجاگر کیا جائے گا۔