کراچی کی اہم شاہراہوں سے تجاوزات ہٹانے کے لیے بڑے کریک ڈاؤن کا فیصلہ

سندھ حکومت نے کراچی کی اہم شاہراہوں سے تجاوزات کے خاتمے کے لیے بڑے پیمانے پر کریک ڈاؤن کرنے کا فیصلہ کیا ہے۔ اس سلسلے میں سینئر صوبائی وزیر اور وزیر برائے اطلاعات، ٹرانسپورٹ و ماس ٹرانزٹ شرجیل انعام میمن کی زیر صدارت ایک اہم اجلاس منعقد ہوا، جس میں پولیس، شہری انتظامیہ اور محکمہ ٹرانسپورٹ کو مشترکہ طور پر کارروائی کی ہدایت دی گئی۔

اجلاس کے مطابق پہلے مرحلے میں یونیورسٹی روڈ سمیت شہر کی دیگر اہم شاہراہوں اور پیپلز بس سروس کے مختلف روٹس پر ترجیحی بنیادوں پر آپریشن کیا جائے گا۔ اس موقع پر کمشنر کراچی حسن نقوی، سیکریٹری ٹرانسپورٹ اسد ضامن، کراچی پولیس چیف آزاد خان، ڈی آئی جی ٹریفک پیر محمد شاہ اور ڈی آئی جی ایسٹ فرخ لنجار سمیت دیگر متعلقہ حکام موجود تھے۔

اجلاس میں فیصلہ کیا گیا کہ ٹریفک کی روانی میں رکاوٹ بننے والی غیر قانونی تجاوزات کے خلاف فوری کارروائی کی جائے گی۔ اس کے علاوہ سہراب گوٹھ سمیت شہر کے مختلف علاقوں میں قائم غیر قانونی بس اڈوں کو بھی شہر سے باہر منتقل کرنے کے اقدامات کیے جائیں گے، جبکہ بس ٹرمینلز کے خلاف بھی آپریشن کیا جائے گا۔

شرجیل انعام میمن نے کہا کہ اہم شاہراہوں اور بس روٹس پر تجاوزات کے باعث شہریوں اور مسافروں کو شدید مشکلات کا سامنا کرنا پڑتا ہے۔ سڑکوں پر غیر قانونی قبضوں سے ٹریفک کی روانی متاثر ہوتی ہے، ایندھن کے اخراجات بڑھتے ہیں اور پبلک ٹرانسپورٹ کی آمدورفت میں بھی دشواری پیش آتی ہے۔ انہوں نے زور دیا کہ شہریوں کو بہتر سفری سہولیات فراہم کرنے کے لیے شاہراہوں اور بس روٹس کو تجاوزات سے پاک کرنا ضروری ہے۔

اجلاس میں پبلک پرائیویٹ پارٹنرشپ کے تحت کراچی سے باہر جدید بس اڈے قائم کرنے اور کراچی بس ٹرمینل کی توسیع کے منصوبے پر بھی تبادلہ خیال کیا گیا۔ وزیر نے متعلقہ حکام کو ہدایت کی کہ لاجسٹکس پارک کے قیام کے لیے کوششیں تیز کی جائیں تاکہ شہر میں ٹرانسپورٹ کے نظام کو منظم اور ٹریفک کی روانی کو بہتر بنایا جا سکے۔

واضح رہے کہ اس اقدام کا مقصد شہر کی سڑکوں پر ٹریفک کا دباؤ کم کرنا اور عوام کو آمدورفت میں سہولت فراہم کرنا ہے، تاہم تجاوزات کے خاتمے اور بس اڈوں کی منتقلی کے لیے متعلقہ محکموں کے درمیان مشترکہ حکمت عملی کے تحت کام کیا جائے گا۔