وزیراعظم شہباز شریف کا کوپ 31 میں موسمیاتی انصاف اور عالمی یکجہتی پر زور

وزیراعظم شہباز شریف نے ترکیہ کے شہر انطالیہ میں منعقدہ اقوام متحدہ کی موسمیاتی تبدیلی کانفرنس کوپ 31 کے سربراہی اجلاس میں پاکستان کا قومی مؤقف پیش کرتے ہوئے کہا کہ کرہ ارض پر زندگی کے تحفظ اور موسمیاتی تبدیلیوں کے اثرات سے نمٹنے کے لیے مشترکہ عالمی ذمہ داری ادا کرنا ناگزیر ہے۔ انہوں نے واضح کیا کہ موسمیاتی آفات کا مقابلہ صرف مؤثر اور منصفانہ اقدامات کے ذریعے ممکن ہے، اور عالمی یکجہتی کو خالی نعروں کی بجائے حقیقی عملی اقدامات میں بدلنا ہوگا۔

اپنے خطاب میں وزیراعظم نے 2025 میں ضلع بونیر میں آنے والے تباہ کن سیلاب کا ذکر کرتے ہوئے بتایا کہ ایک نوجوان کا پورا گاؤں اس کی شادی سے صرف دو دن قبل سیلابی ریلے کی نذر ہو گیا اور خوشیوں سے بھرا گھر ماتم کدے میں تبدیل ہو گیا۔ انہوں نے کہا کہ متاثرہ خاندانوں سے ملاقات کے دوران انہیں جو دکھ دیکھنے کو ملا وہ ایک ذاتی المیہ تھا، لیکن اس کے پیچھے موجود خطرے کی علامات پوری دنیا کے لیے انتباہ ہیں۔ ان کے مطابق یہ کہانی صرف پاکستان کی نہیں بلکہ ترقی پذیر دنیا کے کروڑوں لوگوں کی ہے جن کا موسمیاتی تبدیلیوں میں حصہ سب سے کم ہے مگر سنگین نتائج انہی کو بھگتنا پڑ رہے ہیں۔

وزیراعظم نے 2022 کے تباہ کن سیلاب کا حوالہ دیتے ہوئے یاد دلایا کہ اس وقت ملک کا ایک تہائی حصہ زیر آب آ گیا تھا، تین کروڑ تیس لاکھ افراد متاثر ہوئے، سترہ سو سے زائد افراد جاں بحق ہوئے جبکہ معاشی نقصانات تیس ارب ڈالر سے تجاوز کر گئے تھے۔ انہوں نے کہا کہ چار سال قبل اقوام متحدہ میں انہوں نے خبردار کیا تھا کہ پاکستان میں رونما ہونے والے واقعات ملک تک محدود نہیں رہیں گے، اور بدقسمتی سے وہ انتباہ آج حقیقت بن چکا ہے۔ ان کا کہنا تھا کہ موسمیاتی تبدیلی کے اثرات سرحدوں کے پابند نہیں اور کوئی بھی ملک تنہا ان کا مقابلہ نہیں کر سکتا۔

خطاب میں وزیراعظم نے 2010 اور 2022 کے سیلابوں کے دوران پاکستان کے ساتھ کھڑے رہنے پر ترکیہ کے صدر رجب طیب اردوان، خاتون اول امینہ اردوان اور ترک عوام کا خصوصی شکریہ ادا کیا اور کہا کہ ان کی دوستی اور یکجہتی ہمیشہ پاکستانی عوام کے دلوں میں زندہ رہے گی۔ انہوں نے بتایا کہ انطالیہ روانگی سے قبل انہوں نے چشمہ فائیو نیوکلیئر پاور پلانٹ کے ڈوم پلیسمنٹ کی تقریب میں شرکت کی، جو فعال ہونے کے بعد بارہ سو میگاواٹ صاف اور کاربن کے اخراج سے پاک بجلی پیدا کرے گا۔

وزیراعظم نے کہا کہ پاکستان ماحول دوست عملی اقدامات کے ذریعے قیادت کر رہا ہے اور صرف دو برسوں میں ملک میں ترسیلی شمسی توانائی کی صلاحیت میں بیس گیگاواٹ سے زیادہ اضافہ کیا گیا ہے۔ ان کے مطابق پاکستان کے توانائی کے مجموعی ذرائع میں صاف توانائی کا حصہ اب تقریباً پچپن فیصد ہو چکا ہے، برقی نقل و حرکت کو فروغ دیا جا رہا ہے اور 2035 تک کاربن اخراج میں پچاس فیصد تک کمی کا ہدف مقرر کیا گیا ہے۔

انہوں نے واضح کیا کہ قومی سطح پر کی جانے والی کوششیں منصفانہ عالمی ردعمل کا متبادل نہیں ہو سکتیں، اور موسمیاتی آفات کی صورت میں متاثرہ ممالک کو بروقت مدد کے ساتھ ایسی مالی معاونت درکار ہے جو ان کے قرضوں میں مزید اضافہ نہ کرے۔ وزیراعظم نے گرانٹ پر مبنی مالی معاونت، سرکاری و نجی شعبے کی شراکت داری اور موسمیاتی لچک و موافقت کے فنڈز میں نمایاں اضافے پر زور دیا۔ انہوں نے یہ بھی کہا کہ پانی کو کبھی بطور ہتھیار استعمال نہیں کیا جانا چاہیے اور آبی معاہدوں پر ان کی حقیقی روح کے مطابق عمل درآمد یقینی بنایا جانا چاہیے تاکہ زیریں علاقوں میں آباد لوگوں کی زندگیاں اور روزگار خطرے میں نہ پڑیں۔

اختتام پر وزیراعظم نے کہا کہ کوپ 31 کی کامیابی کا پیمانہ یہاں کیے جانے والے وعدے نہیں بلکہ وہ خاندان ہوں گے جنہیں تحفظ فراہم کیا جائے گا، وہ وسائل ہوں گے جو فراہم کیے جائیں گے اور وہ بامعنی اقدامات ہوں گے جنہیں مستقل بنیادوں پر جاری رکھا جائے گا۔