وزیراعظم شہباز شریف اور صدر اردوان کی انطالیہ میں ملاقات، تجارت، دفاع اور علاقائی امن پر تبادلہ خیال

ترکیہ کے شہر انطالیہ میں اقوام متحدہ کے ماحولیاتی تبدیلی کے فریم ورک کنونشن کے تحت کوپ 31 سربراہی اجلاس کے موقع پر وزیراعظم محمد شہباز شریف اور ترکیہ کے صدر رجب طیب اردوان کے درمیان دوطرفہ ملاقات ہوئی۔ اس ملاقات میں دونوں رہنماؤں نے خطے کی سکیورٹی صورتحال، کشیدگی میں کمی اور مذاکرات کے فروغ کے لیے اٹھائے جانے والے اقدامات پر تفصیلی تبادلہ خیال کیا۔

ملاقات کے دوران دونوں رہنماؤں نے پاکستان اور ترکیہ کے درمیان گہرے، تاریخی اور برادرانہ تعلقات کا اعادہ کیا اور اس امر پر اطمینان کا اظہار کیا کہ دوطرفہ تعلقات مثبت سمت میں آگے بڑھ رہے ہیں۔ انہوں نے باہمی تعاون کو مزید فروغ دینے کے مختلف پہلوؤں پر بھی بات کی، جن میں خاص طور پر تجارت و سرمایہ کاری، دفاعی تعاون، توانائی کے شعبے میں اشتراک اور علاقائی روابط کی مضبوطی شامل ہیں۔

دونوں رہنماؤں نے موجودہ اقدامات پر عملدرآمد کو تیز کرنے اور اقتصادی روابط کو مزید مستحکم بنانے کے لیے نئے مواقع تلاش کرنے کی اہمیت پر زور دیا۔ انہوں نے خطے کی بدلتی ہوئی صورتحال اور عالمی سطح پر ہونے والی اہم پیش رفتوں کا بھی جائزہ لیا۔

وزیراعظم شہباز شریف نے کشیدگی میں کمی اور مذاکرات کے فروغ کے لیے علاقائی ممالک، بالخصوص معاہدہ مکہ کے رکن ممالک کی جاری کوششوں کو نمایاں کیا۔ صدر رجب طیب اردوان نے پاکستان کے تعمیری کردار اور ان سفارتی کوششوں کو سراہا جن کے نتیجے میں اسلام آباد مفاہمتی یادداشت پر دستخط ہوئے۔

وزیراعظم نے پاکستان کی جاری سفارتی کوششوں کے دوران مستقل حمایت اور قریبی رابطہ کاری پر صدر اردوان کا شکریہ ادا کیا۔ دونوں رہنماؤں نے خطے میں پائیدار اور دیرپا امن کے قیام کو یقینی بنانے کے لیے اسلام آباد مفاہمتی یادداشت کے تحت تمام فریقین کی جانب سے اپنے وعدوں اور ذمہ داریوں کی پاسداری کی اہمیت پر زور دیا۔

دونوں رہنماؤں نے قومی مفاد کے بنیادی امور پر ایک دوسرے کی غیر متزلزل حمایت کا اعادہ کیا، جو پاکستان اور ترکیہ کے درمیان باہمی اعتماد اور یکجہتی کی دیرینہ روایت کا مظہر ہے۔ انہوں نے برادرانہ تعلقات اور امن و خوشحالی کے مشترکہ وژن کی بنیاد پر دونوں ممالک کی اسٹریٹجک شراکت داری کو مزید مضبوط بنانے کے عزم کا بھی اعادہ کیا۔