پی سی بی چیئرمین محسن نقوی کا این سی اے دورہ، امام الحق اور محمد رضوان کے مستقبل کا فیصلہ این سی سی آئی اے حکام پر چھوڑ دیا

پاکستان کرکٹ بورڈ (پی سی بی) کے چیئرمین محسن نقوی نے کہا ہے کہ قومی ٹیم کے کھلاڑیوں امام الحق اور محمد رضوان کے مستقبل کا فیصلہ این سی سی آئی اے کے حکام کریں گے۔ یہ بات انہوں نے نیشنل کرکٹ اکیڈمی لاہور کے دورے کے موقع پر میڈیا سے گفتگو کرتے ہوئے کہی۔

چیئرمین پی سی بی نے واضح کیا کہ سلیکشن کمیٹی میں کوئی تبدیلی نہیں کی جا رہی اور کرکٹ کی بہتری کے لیے کیے جانے والے تمام فیصلوں کو قبول کریں گے۔ انہوں نے کہا کہ موجودہ ٹیم اچھا کام کر رہی ہے، ان پر اعتماد ہے اور جو حکمت عملی بنائی گئی ہے اسے جاری رکھا جائے گا۔

انہوں نے بتایا کہ نیشنل کرکٹ اکیڈمی کی اپ گریڈیشن کی ڈیڈ لائن 31 جنوری ہے اور یہ ایک مکمل اسٹیٹ آف دی آرٹ اکیڈمی ہوگی جہاں ہر قسم کی ٹریننگ کی سہولت موجود ہوگی۔ اکیڈمی کے ماسٹر پلان کے ڈیزائن کا کریڈٹ عاقب جاوید کو جاتا ہے جنہوں نے اسے ڈیزائننگ ٹیم کے ساتھ مل کر تیار کیا۔

محسن نقوی نے کہا کہ جدید بائیو میکینکس لیب کے لیے دنیا کی جدید ترین مشینری منگوائی جا رہی ہے۔ اس لیب سے نہ صرف قومی کھلاڑیوں بلکہ انڈر 15، انڈر 17 اور انڈر 19 کے کھلاڑیوں کی تکنیک، موومنٹ اور خامیوں کا سائنسی ڈیٹا حاصل کیا جائے گا تاکہ ان کی اصلاح بروقت کی جا سکے۔

ان کا کہنا تھا کہ نیشنل کرکٹ اکیڈمی میں نوجوان کھلاڑیوں کے لیے 3 سے 6 ماہ دورانیے کے خصوصی تربیتی کیمپس منعقد کیے جا رہے ہیں۔ ان کیمپس کا مقصد صرف فٹنس نہیں بلکہ کھلاڑیوں کی بنیادی تکنیکی خامیوں کو دور کرنا ہے تاکہ جب وہ قومی اسکواڈ میں آئیں تو انہیں بنیادی چیزیں سیکھنے کے بجائے براہ راست کارکردگی دکھانے کا موقع ملے۔

پی ایس ایل فرنچائزز کے بارے میں چیئرمین پی سی بی نے کہا کہ گزشتہ سال فرنچائزز ریکارڈ قیمتوں پر فروخت ہوئی تھیں۔ کسی بھی کاروبار کی فزیبلٹی میں ابتدائی دو سے تین سال کے دوران مشکلات کا امکان پہلے ہی شامل ہوتا ہے اس لیے اسے بحران نہ سمجھا جائے۔ انہوں نے کہا کہ اگر کوئی فرنچائز مالک مستقبل میں اپنی ٹیم منافع پر فروخت کرنا چاہے تو پی سی بی اس کا خیر مقدم کرے گا اور پی ایس ایل کے حوالے سے جو بھی حتمی فیصلہ ہوگا اس سے بروقت آگاہ کر دیا جائے گا۔

انہوں نے ٹیسٹ میچز سمیت ہر سطح پر نوجوان کھلاڑیوں کو موقع دینے کی پالیسی جاری رکھنے کی توثیق کی اور کہا کہ سینٹرل کنٹریکٹس پر کام ہو رہا ہے، جلد اس کا اعلان کر دیا جائے گا۔ امام الحق اور محمد رضوان کو چند روز میں این سی سی آئی اے حکام طلب کریں گے اور ان کے مستقبل کے بارے میں وہی فیصلہ کریں گے۔