محسن نقوی کا صوبوں کے معاملے پر ریفرنڈم کی تجویز، بلاول کے ساتھ 'ایک پیج' ہونے کا دعویٰ

وفاقی وزیر داخلہ محسن نقوی نے کہا ہے کہ نئے صوبوں کے قیام کے حوالے سے عوام کے خیالات جاننے کے لیے سروے کے نتائج سامنے آچکے ہیں، اب سیاسی جماعتوں کو چاہیے کہ وہ عوامی رائے کا احترام کرتے ہوئے ریفرنڈم کروائیں تاکہ اس معاملے کا حتمی اور جمہوری حل نکالا جا سکے۔

اسلام آباد میں قومی رابطہ کمیٹی برائے انسداد دہشت گردی (نیکٹا) کے صدر دفتر میں میڈیا سے گفتگو کرتے ہوئے وزیر داخلہ نے کہا کہ صوبوں کی حمایت میں عوامی سروے کے نتائج واضح کرتے ہیں کہ عوام کی اکثریت نئے صوبے بنانے کے حق میں ہے، اس لیے سیاسی جماعتوں کو عوامی رائے کو نظر انداز نہیں کرنا چاہیے۔

محسن نقوی نے کہا کہ وہ پاکستان پیپلز پارٹی کے چیئرمین بلاول بھٹو زرداری کی اس بات سے متفق ہیں کہ اگر عوام چاہیں تو نئے صوبے بننے چاہئیں، اور اس معاملے پر وہ مکمل طور پر عوامی ریفرنڈم کے نتیجے کے ساتھ کھڑے رہیں گے۔ ان کے مطابق تمام سیاسی جماعتوں کی رائے اہم ہے اور اسے مسترد نہیں کیا جا سکتا، تاہم اس مسئلے کا بہترین حل ریفرنڈم کے ذریعے عوام سے براہ راست رائے لینا ہے۔

وزیر داخلہ نے مزید کہا کہ تمام جماعتیں جمہوریت اور عوام کی بالادستی کی بات کرتی ہیں، لہٰذا اگر عوام نئے صوبوں کے حق میں رائے دیں تو اسے تسلیم کیا جانا چاہیے۔ انہوں نے کہا کہ پیپلز پارٹی اپنے فیصلے کی خود مختار ہے، وہ چاہے تو عوامی رائے لیے یا اس سے بہتر کوئی راستہ سمجھتی ہو تو اختیار کرے۔

انہوں نے سسٹم ری سیٹ کے معاملے پر بھی بات کی اور کہا کہ اس حوالے سے وہ اور بلاول بھٹو زرداری ایک ہی صفحے پر ہیں، جبکہ ان کی ذاتی خواہش ہے کہ پورا نظام از سر نو ترتیب دیا جائے تاکہ معاملات بہتری کی جانب گامزن ہو سکیں۔

واضح رہے کہ وزیر داخلہ کی یہ گفتگو ایسے وقت میں سامنے آئی ہے جب ملک میں انتظامی اور سیاسی اصلاحات، نئے صوبوں کی تشکیل اور عوامی رائے کی اہمیت پر بحث جاری ہے، اور مختلف جماعتیں اس حوالے سے اپنے موقف کا اظہار کر رہی ہیں۔