لکی مروت میں پولیس اور سی ٹی ڈی کی مشترکہ کارروائی، دو دہشت گرد ہلاک

لکی مروت کے علاقے خیرو خیل پکہ میں ایک چرواہے کو مبینہ طور پر اغوا کر کے پہاڑی علاقے کی طرف لے جانے کی اطلاع ملی، جس پر پولیس، کاؤنٹر ٹیررازم ڈیپارٹمنٹ (سی ٹی ڈی)، مقامی امن کمیٹیوں اور اے پی سیز نے مشترکہ کارروائی شروع کی۔ حکام کے مطابق اطلاع ملتے ہی قانون نافذ کرنے والے اداروں نے ملزمان کا تعاقب کیا اور پہاڑی علاقے میں ان کا گھیراؤ کر لیا۔

پولیس کے مطابق تعاقب کے دوران قانون نافذ کرنے والے اداروں اور ملزمان کے درمیان شدید فائرنگ کا تبادلہ ہوا، جس کے نتیجے میں دو دہشت گرد ہلاک ہوگئے۔ ہلاک ہونے والوں کی شناخت ہیواد اور سہیل کے نام سے ہوئی ہے، جو خیرو خیل کے رہائشی بتائے جاتے ہیں۔

کارروائی کی قیادت ڈسٹرکٹ پولیس آفیسر (ڈی پی او) لکی مروت سجاد احمد صاحبزادہ کر رہے تھے، جنہوں نے بتایا کہ مقامی پولیس، سی ٹی ڈی، امن کمیٹیوں اور اے پی سیز نے مشترکہ طور پر اس آپریشن میں حصہ لیا۔ فائرنگ کے تبادلے کے دوران خیرو خیل پکہ کا ایک شہری بھی زخمی ہوا، جسے فوری طور پر طبی امداد کے لیے اسپتال منتقل کر دیا گیا۔

پولیس نے ہلاک شدگان کی لاشوں کو تحویل میں لے کر قانونی کارروائی شروع کر دی ہے۔ حکام کے مطابق علاقے میں ممکنہ ٹھکانوں اور دیگر ساتھیوں کی تلاش کے لیے وسیع پیمانے پر سرچ آپریشن جاری ہے تاکہ خطرے کو مکمل طور پر ختم کیا جا سکے۔

ڈی پی او لکی مروت کا کہنا تھا کہ پولیس عوام کے جان و مال کے تحفظ اور علاقے میں امن و امان برقرار رکھنے کے لیے دیگر قانون نافذ کرنے والے اداروں کے ساتھ مل کر کارروائیاں جاری رکھے ہوئے ہے۔ اس قسم کی مشترکہ کارروائیاں مقامی سطح پر سکیورٹی فورسز کے تعاون کو مزید مستحکم کرتی ہیں۔