برطانوی عدالت نے ایرانی صحافیوں کے خلاف منصوبہ بندی کے الزام میں دو ایرانی شہریوں کو مجرم قرار دے دیا

لندن کی ایک عدالت نے حکومت مخالف ایرانی صحافیوں کی نگرانی اور ان کے خلاف ممکنہ حملے کی منصوبہ بندی کے الزام میں دو ایرانی شہریوں کو مجرم قرار دے دیا، جبکہ اسی مقدمے میں ایک تیسرے ملزم کو شواہد کی کمی کے باعث بری کر دیا گیا۔ یہ مقدمہ برطانیہ میں ایران سے لاحق سکیورٹی خدشات کے تناظر میں اہم سمجھا جا رہا ہے۔

خبر رساں ادارے کے مطابق 41 سالہ مصطفیٰ سپاہوند کو دو الزامات میں مجرم ٹھہرایا گیا، جن میں غیر ملکی خفیہ ادارے کی معاونت اور ممکنہ حملے کی تیاری شامل ہے۔ دوسرے ملزم 46 سالہ فرہاد جوادی منیش کو غیر ملکی خفیہ ادارے کی معاونت کے الزام میں قصوروار قرار دیا گیا، جبکہ 57 سالہ شپُور قلعہلی خانی نوری کو دونوں الزامات سے بری کر دیا گیا۔

استغاثہ کے مطابق ملزمان نے اگست 2024 سے مارچ 2025 کے دوران لندن میں قائم فارسی زبان کے نشریاتی ادارے ایران انٹرنیشنل سے وابستہ صحافیوں مجتبیٰ پورمحسن اور کامبیز حسینی کی ریکی کی۔ الزام ہے کہ انھوں نے دونوں صحافیوں کی رہائش گاہوں اور نقل و حرکت کی نگرانی کی، ان کی تصاویر اور ویڈیوز بنائیں اور ان کے بارے میں معلومات جمع کیں۔

برطانوی پولیس کے مطابق یہ پہلا موقع ہے کہ ایرانی شہریوں کو 2023 میں نافذ ہونے والے قومی سلامتی کے قانون کے تحت مجرم قرار دیا گیا ہے۔ انسداد دہشت گردی پولیس کی اعلیٰ رابطہ کار وکی ایونز نے کہا کہ یہ مقدمہ برطانیہ کو ایران سے لاحق بڑھتے ہوئے خطرات کی عکاسی کرتا ہے۔

دوسری جانب ایران مسلسل جاسوسی میں ملوث ہونے کے الزامات کی تردید کرتا رہا ہے، اور ایرانی وزیر خارجہ عباس عراقچی نے مئی 2025 میں ملزمان کی گرفتاری پر تشویش کا اظہار کیا تھا۔ دونوں مجرموں کو آئندہ ماہ سزا سنائے جانے کا امکان ہے۔

واضح رہے کہ برطانیہ اور ایران کے درمیان حکومت مخالف صحافیوں اور سیاسی مخالفین کی نگرانی کے معاملے پر پہلے بھی کشیدگی رہی ہے۔ لندن میں قائم ایران انٹرنیشنل فارسی زبان کا نشریاتی ادارہ ہے جو ایرانی حکومت پر تنقید کے باعث تہران کے نشانے پر رہتا ہے۔