شدید دھند کے باعث موٹروے ایم 4 کئی مقامات سے ٹریفک کے لیے بند
موٹروے پولیس کے مطابق دھند کی شدت کے پیش نظر ایم 4 کے مختلف حصے بند کیے گئے ہیں تاکہ مسافروں کی جان و مال محفوظ رہے، اور شہریوں کو دن 10 بجے سے شام 6 بجے کے درمیان سفر کی ہدایت کی گئی ہے۔
یہ خبر اور ہر اہم خبر سب سے پہلے واٹس ایپ پر پائیںaround.pk اردو خبریں چینل — مفت، بغیر سپیم فالو کریں
پنجاب کے مختلف علاقوں میں شدید دھند کے باعث موٹروے ایم 4 کو کئی مقامات سے ٹریفک کے لیے بند کر دیا گیا ہے۔ موٹروے پولیس کے مطابق فیصل آباد سے پنڈی بھٹیاں اور عبدالحکیم سے پنڈی بھٹیاں تک روٹ پر گاڑیوں کی آمدورفت روک دی گئی ہے تاکہ دھند میں حادثات کا خطرہ کم کیا جا سکے۔
ترجمان موٹروے پولیس سید عمران احمد کے مطابق حدِ نگاہ متاثر ہونے کی وجہ سے ابتدا میں ایم 4 کے عبدالحکیم سے پنڈی بھٹیاں والے حصے کو صرف ہیوی ٹریفک کے لیے بند کیا گیا تھا، تاہم دھند کی شدت بڑھنے پر فیصل آباد سے پنڈی بھٹیاں تک ہر قسم کی گاڑیوں کی آمدورفت بھی بند کر دی گئی۔
موٹروے پولیس کا کہنا ہے کہ شاہراہیں بند کرنے کا بنیادی مقصد مسافروں کی جان و مال کا تحفظ ہے۔ شہریوں کو ہدایت کی گئی ہے کہ دھند کے دوران غیر ضروری سفر سے گریز کریں اور اگر سفر ناگزیر ہو تو دن کی روشنی میں سفر کریں۔
ترجمان کے مطابق دھند کے موسم میں سفر کے لیے صبح 10 بجے سے شام 6 بجے تک کا وقت زیادہ موزوں ہے۔ ڈرائیوروں کو ہدایت کی گئی ہے کہ دورانِ سفر رفتار کم رکھیں، آگے چلنے والی گاڑی سے مناسب فاصلہ برقرار رکھیں، لین کی پابندی کریں اور غیر ضروری اوورٹیکنگ سے اجتناب کریں۔
موٹروے پولیس نے مزید کہا ہے کہ دھند میں گاڑیوں کی فوگ لائٹس استعمال کی جائیں جبکہ ہیڈ لائٹس، بیک لائٹس اور وائپرز کو درست حالت میں رکھا جائے تاکہ حدِ نگاہ کم ہونے کے باوجود حادثات سے بچا جا سکے۔ مسافروں کو مشورہ دیا گیا ہے کہ وہ سفر سے قبل موٹروے پولیس کے سرکاری ذرائع سے راستوں کی صورتحال ضرور چیک کریں۔
اب تک کی کہانی موٹروے ایم 4
- شدید دھند کے باعث موٹروے ایم 4 کے کئی حصے ٹریفک کے لیے بند
- شدید دھند کے باعث موٹروے ایم 4 ہیوی ٹریفک کے لیے بند







