فیول سبسڈی اسکیم: وزیراعظم کی ہر پیٹرول پمپ پر رہنمائی کے لیے سہولت ڈیسک قائم کرنے کی ہدایت

وزیراعظم شہباز شریف نے فیول سبسڈی اسکیم کے تحت شہریوں کی مدد کے لیے انتظامیہ، رضاکاروں اور پیٹرول پمپ کے عملے پر مشتمل سہولت ڈیسک قائم کرنے کی ہدایت کی ہے۔

وزیراعظم آفس کے مطابق یہ ہدایت پی ایم اسپیشل ریلیف اسکیم کی پیش رفت کے جائزہ اجلاس میں دی گئی۔ یہ اسکیم خلیج کی صورتحال کے باعث پیٹرولیم مصنوعات مہنگی ہونے پر کم آمدنی اور متوسط طبقے کو ریلیف دینے کے لیے شروع کی گئی ہے، جس کے تحت موٹر سائیکل، رکشہ اور 800 سی سی تک کی گاڑیوں کے مالکان کو سبسڈی دی جا رہی ہے۔

وزیراعظم نے کہا کہ سہولت ڈیسک مستحق شہریوں کو رجسٹریشن سمیت تمام مراحل میں رہنمائی فراہم کریں اور متعلقہ حکام اسکیم کے بارے میں عوامی آگاہی کے لیے متحرک رہیں۔

اجلاس کو بتایا گیا کہ اسلام آباد میں پائلٹ منصوبے کے بعد اسکیم آزاد جموں و کشمیر اور گلگت بلتستان سمیت پورے ملک میں شروع کی جا چکی ہے اور کامیاب رجسٹریشنز کی تعداد بتدریج بڑھ رہی ہے۔

بریفنگ کے مطابق رجسٹریشن کے لیے صرف چار معلومات درکار ہیں: شناختی کارڈ نمبر، گاڑی کی نمبر پلیٹ، رجسٹریشن کا صوبہ اور گاڑی کی رجسٹریشن کی تاریخ۔ اسکیم کی مکمل تفصیلات سرکاری ویب سائٹ pmfuelrelief.pk پر دستیاب ہیں۔