سندھ میں مویشیوں کی بہتر نسل کے لیے ایمبریو ٹرانسفر ٹیکنالوجی کا کامیاب تجربہ

سندھ حکومت نے دودھ اور گوشت کی پیداوار بڑھانے کے لیے مویشیوں کی بہتر نسل تیار کرنے کی غرض سے جدید ٹیکنالوجی متعارف کر دی ہے۔ محکمہ لائیو اسٹاک سندھ اور فون گرو کے اشتراک سے سندھ انسٹی ٹیوٹ آف اینیمل سائنس میں ایمبریو ٹرانسفر کا پہلا تجربہ کامیابی سے مکمل ہوا، جسے لائیو اسٹاک کے شعبے میں ایک اہم سنگ میل قرار دیا جا رہا ہے۔

وزیراعلیٰ سندھ مراد علی شاہ نے اس کامیابی پر مبارکباد دیتے ہوئے کہا کہ جدید ٹیکنالوجی کی بدولت مویشیوں کی بہتر نسل کم وقت میں تیار کی جا سکے گی۔ ان کے مطابق نسل بہتر بنانے کا روایتی عمل جو پہلے 30 سال پر محیط تھا، اب صرف 5 سال میں مکمل ہو جائے گا۔

وزیر لائیو اسٹاک محمد علی ملکانی نے وزیراعلیٰ سندھ کو کامیاب تجربے کی تفصیلات سے آگاہ کیا۔ حکومت نے 132 ریڈ سندھی اور گوزیرا نسل کے ایمبریوز کا آرڈر دے دیا ہے، جبکہ نجی شعبے کے کسانوں کی جانب سے بھی 90 ایمبریوز کا آرڈر دیا گیا ہے۔ وزیراعلیٰ نے کسانوں کی جانب سے اس دلچسپی کو منصوبے کی کامیابی کا واضح ثبوت قرار دیا۔

اس ٹیکنالوجی کے ذریعے مقامی نسل کے مویشیوں کو جدید سائنسی طریقوں سے مزید بہتر بنایا جائے گا، جس سے اعلیٰ نسل کے مویشی تیار کرنے میں مدد ملے گی۔ حکام کے مطابق بہتر نسل کے مویشیوں سے دودھ اور گوشت کی پیداوار میں اضافہ ممکن ہو گا اور ملک میں ان اشیاء کی بڑھتی ہوئی طلب کو پورا کرنے میں بھی مدد ملے گی۔

وزیراعلیٰ سندھ نے کہا کہ حکومت لائیو اسٹاک کے شعبے میں جدید تحقیق اور ٹیکنالوجی کو فروغ دے رہی ہے۔ وزیر لائیو اسٹاک نے بتایا کہ سندھ کی مقامی ریڈ سندھی اور گوزیرا نسل کو مزید بہتر بنایا جائے گا، جس سے مویشی پالنے والے کسانوں کی آمدنی بڑھانے میں بھی مدد ملے گی اور سندھ کے کسانوں اور مویشی پالنے والوں کے لیے ترقی کے نئے مواقع پیدا ہوں گے۔