فیلڈ مارشل عاصم منیر کا ایس ایس جی تربیلا کا دورہ، مقامی دفاعی صلاحیتوں کی ترقی پر زور

چیف آف ڈیفنس فورسز فیلڈ مارشل عاصم منیر نے ہیڈکوارٹرز ایس ایس جی تربیلا کا دورہ کیا، جہاں انہیں خصوصی خدمات گروپ کی تربیت، آپریشنل تیاریوں اور مشن کی تکمیل کے لیے استعداد کار پر تفصیلی بریفنگ دی گئی۔ پاک فوج کے شعبہ تعلقات عامہ (آئی ایس پی آر) کے مطابق موقع پر جی او سی ایس ایس جی نے ان کا استقبال کیا۔

دورے کے آغاز میں فیلڈ مارشل عاصم منیر نے شہدا یادگار پر پھولوں کی چادر چڑھائی اور فاتحہ خوانی کی۔ انہوں نے وطن کے دفاع میں جانوں کا نذرانہ پیش کرنے والے ایس ایس جی کے شہدا کو خراج عقیدت پیش کیا اور ان کی قربانیوں کو زندہ جاوید قرار دیا۔

آئی ایس پی آر کے بیان کے مطابق آرمی چیف نے جدید ترین خصوصی آلات کا معائنہ کیا اور ایس ایس جی کی جنگی مہارت اور خصوصی آپریشنز کا عملی مظاہرہ بھی دیکھا۔ انہوں نے افسران اور جوانوں کے پیشہ ورانہ معیار، بلند حوصلے اور فرض شناسی کو سراہتے ہوئے کہا کہ یہ ادارہ ملکی سلامتی کے لیے ایک قابلِ فخر اثاثہ ہے۔

فیلڈ مارشل عاصم منیر نے کہا کہ بدلتے ہوئے سیکیورٹی خطرات اور نئے چیلنجز سے نمٹنے کے لیے مسلسل تربیت ناگزیر ہے، جبکہ مقامی سطح پر دفاعی صلاحیتوں کی ترقی اور آپریشنل تیاریوں پر غیر متزلزل توجہ ضروری ہے۔ ان کا کہنا تھا کہ ایس ایس جی کو بدلتے ہوئے خطرات کے مقابلے میں برتری برقرار رکھنے کے لیے اعلیٰ معیار کی تیاری جاری رکھنا ہوگی۔

واضح رہے کہ ایس ایس جی پاک فوج کا ایک اہم خصوصی آپریشنز ادارہ ہے جو مشکل ترین ماحول میں مہمات کی انجام دہی کے لیے تربیت یافتہ ہے۔ دفاعی ماہرین کے مطابق اس طرح کے دورے نہ صرف فورسز کے مورال کو بلند کرتے ہیں بلکہ مقامی دفاعی صلاحیتوں اور خود انحصاری کی حکمت عملی کو بھی تقویت دیتے ہیں۔