گلگت بلتستان میں یومِ آزادی جوش و جذبے سے منایا جا رہا ہے، آئی ایس پی آر کا خصوصی ملی نغمہ جاری

گلگت بلتستان میں آج یکم نومبر کو یومِ آزادی قومی جوش و جذبے کے ساتھ منایا جا رہا ہے۔ اس موقع پر خطے کے لوگ 1947 کی تاریخی جدوجہد کی یاد تازہ کر رہے ہیں، جس کے نتیجے میں ڈوگرہ راج کا خاتمہ ہوا اور یہ علاقہ پاکستان سے وابستہ ہوا۔ عوام کی بڑی تعداد اپنی قومی شناخت اور پاکستان سے دلی وابستگی کا اظہار بھی کر رہی ہے۔

تاریخی روایات کے مطابق یکم نومبر 1947 کو گلگت بلتستان کے بہادر لوگوں نے ڈوگرہ راج کے خلاف آزادی کی جنگ میں کامیابی حاصل کی اور پاکستان سے الحاق کا اعلان کیا۔ اس جدوجہد میں گلگت اسکاؤٹس اور مقامی جانبازوں نے بھرپور دلیری کا مظاہرہ کیا۔ ایک سال کی مسلسل کوششوں کے بعد 14 اگست 1948 کو بلتستان کو بھی ہندوستانی تسلط سے آزاد کرا لیا گیا۔

گلگت بلتستان کے جوانوں نے ان معرکوں میں دشمن کو شکست دی اور اپنی مادرِ وطن کو بھارتی تسلط میں جانے سے روک دیا۔ یہ جنگی معرکے عالمی سطح پر بہادری کی روشن داستانوں میں شمار کیے جاتے ہیں۔ آزادی کے بعد بھی اس خطے کے لوگوں نے پاک بھارت جنگوں میں نمایاں کارنامے سرانجام دیے اور قومی دفاع میں اہم کردار ادا کیا۔

دریں اثنا، پاک فوج کے شعبہ تعلقاتِ عامہ (آئی ایس پی آر) نے یومِ آزادی گلگت بلتستان کی مناسبت سے خصوصی ملی نغمہ ’شانِ پاکستان، گلگت بلتستان‘ جاری کیا ہے۔ یہ نغمہ گلگت بلتستان کے معروف شاعر ذیشان مہدی کے کلام پر مبنی ہے، جسے گلوکار جے جے علی شینا نے اپنی پُراثر آواز میں پیش کیا ہے۔

آئی ایس پی آر کے مطابق یہ ملی نغمہ گلگت بلتستان کے عوام کی پاکستان سے عقیدت، قومی تشخص اور گہری دلی وابستگی کا عکاس ہے۔ اس میں خطے کی تاریخی جدوجہد اور پاکستان سے جڑے فخر و اعزاز کے جذبات کو اجاگر کیا گیا ہے۔ نغمے کی ریلیز کو یومِ آزادی کی تقریبات کا حصہ قرار دیا جا رہا ہے۔

یومِ آزادی کے موقع پر گلگت بلتستان کے مختلف علاقوں میں تقریبات، ریلیاں اور ثقافتی پروگرام منعقد کیے جا رہے ہیں۔ مقامی لوگ اس دن کو قومی یکجہتی اور اتحاد کے پیغام کے طور پر بھی مناتے ہیں اور اپنے آباؤ اجداد کی قربانیوں کو خراجِ عقیدت پیش کرتے ہیں۔