یوٹیوب کا کمائی نکالنے کی کم از کم حد 100 سے 20 ڈالر کرنے کا تجربہ

ویڈیو شیئرنگ پلیٹ فارم یوٹیوب نے اپنے تخلیق کاروں کے لیے ادائیگی کے نظام میں ممکنہ تبدیلی پر غور شروع کر دیا ہے۔ کمپنی کی جانب سے محدود تعداد میں صارفین پر ایک آزمائشی پروگرام چلایا جا رہا ہے جس کے تحت کم از کم ادائیگی کی حد 100 ڈالر سے کم کر کے 20 ڈالر کر دی گئی ہے۔ اگر یہ تجربہ کامیاب رہا تو کم آمدنی حاصل کرنے والے صارفین بھی اپنی کمائی نسبتاً جلد وصول کر سکیں گے۔

یوٹیوب پارٹنر پروگرام کے تحت آمدنی کمانے والے تخلیق کاروں کو فی الحال عام طور پر اس وقت ادائیگی کی جاتی ہے جب ان کے اکاؤنٹ میں مقررہ کم از کم رقم جمع ہو جائے، جو عموماً 100 ڈالر ہوتی ہے۔ اس پالیسی کی وجہ سے کم آمدنی والے تخلیق کاروں کو اپنی رقم حاصل کرنے کے لیے کافی عرصہ انتظار کرنا پڑتا ہے، جس سے ان کے لیے فوری مالی فائدہ محدود ہو جاتا ہے۔

رپورٹس کے مطابق اس نئی سہولت کی آزمائش امریکا، بھارت اور انڈونیشیا کے منتخب صارفین پر کی جا رہی ہے۔ یوٹیوب نے اپنے بیان میں کہا ہے کہ صارفین کو زیادہ سہولت فراہم کرنے کے لیے عارضی طور پر کم از کم ادائیگی کی حد 100 ڈالر سے گھٹا کر 20 ڈالر کرنے کا تجربہ کیا جا رہا ہے۔ اس کا مطلب یہ ہے کہ آزمائش میں شامل صارفین 100 ڈالر تک آمدنی جمع ہونے کا انتظار کیے بغیر بھی اپنی واجب الادا رقم حاصل کر سکیں گے، بشرطیکہ وہ ادائیگی کی دیگر شرائط پوری کرتے ہوں۔

جن صارفین کو اس تجربے کے لیے منتخب کیا گیا ہے، انہیں یوٹیوب کی جانب سے باقاعدہ اطلاع بھی بھیجی گئی ہے۔ تاہم ابھی یہ واضح نہیں کہ یہ آزمائش کب تک جاری رہے گی یا اسے تمام صارفین کے لیے کب متعارف کرایا جائے گا۔ کمپنی کی جانب سے اس حوالے سے کوئی حتمی شیڈول جاری نہیں کیا گیا۔

یہ پیش رفت ایسے وقت میں سامنے آئی ہے جب انسٹاگرام بھی یوٹیوب سے مقابلے کے لیے 90 منٹ تک طویل ویڈیوز پوسٹ کرنے کی سہولت آزما رہا ہے۔ اگر یوٹیوب کی نئی ادائیگی پالیسی کو مستقل طور پر نافذ کیا گیا تو ممکن ہے کہ مستقبل میں پاکستان سمیت مزید ممالک کے تخلیق کار بھی اس سے فائدہ اٹھا سکیں۔ فی الحال پاکستان میں اس سہولت کے آغاز کی تصدیق نہیں ہوئی۔

یاد رہے کہ دنیا بھر میں اربوں افراد یوٹیوب استعمال کرتے ہیں اور بڑی تعداد میں تخلیق کار اس پلیٹ فارم کے ذریعے اپنی ویڈیوز سے آمدنی حاصل کرتے ہیں۔ ادائیگی کی حد میں ممکنہ کمی سے خاص طور پر ان تخلیق کاروں کو فائدہ پہنچ سکتا ہے جن کی ماہانہ آمدنی کم ہے اور جنہیں ابھی تک 100 ڈالر کی حد مکمل ہونے کا طویل انتظار کرنا پڑتا تھا۔