ایف بی آر کا ٹیکس دہندگان کے لیے آئی آر آئی ایس سسٹم میں نئی سہولت کا اعلان

فیڈرل بورڈ آف ریونیو (ایف بی آر) نے ٹیکس دہندگان کی سہولت کے لیے آئی آر آئی ایس سسٹم میں ایک نئی خصوصیت شامل کی ہے، جس کے تحت اب الیکٹرانک سیلز ٹیکس انوائس میں مقررہ 72 گھنٹے گزرنے کے بعد بھی ترمیم یا منسوخی کی درخواست دی جا سکے گی۔ اس اقدام کا مقصد ٹیکس دہندگان کو درپیش عملی مشکلات کو کم کرنا اور ریکارڈ کی درستی کو یقینی بنانا ہے۔

ایف بی آر کے مطابق انوائس میں ترمیم یا اسے منسوخ کرانے کے لیے متعلقہ کمشنر ان لینڈ ریونیو کی پیشگی منظوری حاصل کرنا لازمی قرار دیا گیا ہے۔ ادارے نے نئی سہولت کے استعمال کے حوالے سے صارف رہنما کتابچہ بھی جاری کر دیا ہے تاکہ ٹیکس دہندگان آسانی سے اس طریقہ کار کو سمجھ سکیں۔

ٹیکس دہندگان آئی آر آئی ایس پورٹل کے ذریعے ترمیم یا منسوخی کی درخواست جمع کرا سکیں گے اور انوائس کی درستی کے لیے متعلقہ دستاویزات پی ڈی ایف فارمیٹ میں منسلک کر سکیں گے۔ تاہم ایک ہی درخواست میں ترمیم اور منسوخی کے لیے منتخب انوائسز پر الگ الگ کارروائی ممکن نہیں ہوگی۔

ایف بی آر کے مطابق درخواست پر فیصلہ آنے تک سیلز ٹیکس ریٹرن کے اینکسچر سی جمع کرانے پر پابندی رہے گی۔ کمشنر ان لینڈ ریونیو کی منظوری کے بعد ترمیم شدہ انوائسز اینکسچر سی میں شامل کی جا سکیں گی، جبکہ درخواست مسترد ہونے کی صورت میں اصل انوائسز ہی اینکسچر سی کا حصہ بنیں گی۔

ادارے نے واضح کیا ہے کہ پہلے سے ریٹرن کے اینکسچر سی سے منسلک انوائسز پر یہ نئی سہولت لاگو نہیں ہوگی۔ اسی طرح مسترد شدہ یا زیر التوا درخواستوں میں شامل انوائسز کو دوبارہ کسی نئی درخواست کا حصہ نہیں بنایا جا سکے گا۔

یہ اقدام ایف بی آر کی جانب سے 72 گھنٹے بعد انوائسز کی درستی اور منسوخی کے لیے ایک باقاعدہ اور شفاف طریقہ کار متعارف کرانے کی کوشش ہے، جس سے ٹیکس دہندگان کو نظام میں زیادہ لچک ملے گی اور ریکارڈ کی درستگی میں بھی مدد ملے گی۔