ایپل کی اے آئی تصاویر میں گوگل کا سنتھ آئی ڈی واٹرمارک شامل ہوگا

ایپل نے اپنے آئی فون صارفین کے لیے ایک اہم ٹیکنالوجی قدم اٹھاتے ہوئے آئی او ایس 27.2 میں گوگل کے تیار کردہ سنتھ آئی ڈی (SynthID) واٹرمارک کی سہولت متعارف کرا دی ہے۔ اس سہولت کے تحت امیج پلے گراؤنڈ سے تیار کردہ تمام تصاویر اور ایپل انٹیلیجنس کے ذریعے ایڈٹ کی گئی بعض تصاویر میں یہ واٹرمارک خود بخود شامل کیا جائے گا۔

گوگل کا سنتھ آئی ڈی مصنوعی ذہانت سے تخلیق شدہ مواد کی شناخت کے لیے استعمال ہوتا ہے اور یہ پکسلز کی سطح پر کام کرتا ہے۔ کمپنی کے مطابق یہ واٹرمارک اس طرح ڈیزائن کیا گیا ہے کہ تصویر کا معیار متاثر کیے بغیر، اسے کراپنگ، مختلف فلٹرز لگانے اور کمپریشن کے عمل کے بعد بھی برقرار رکھا جا سکے۔

واضح رہے کہ آئی فون میں فی الحال اس واٹرمارک کی شناخت کا کوئی براہ راست آپشن موجود نہیں ہے، اس لیے صارفین کو تصویر میں واٹرمارک کی موجودگی کی تصدیق کے لیے سنتھ آئی ڈی ڈیٹیکٹر (SynthID Detector) ویب سائٹ سے مدد لینا ہوگی۔

آزمائشی مرحلے کے دوران یہ بات سامنے آئی کہ معمولی نوعیت کی صفائی یا کلین اپ ترامیم میں واٹرمارک شامل نہیں ہوا، جبکہ بڑی تبدیلیوں والی تصاویر میں یہ واٹرمارک موجود رہا۔ تاہم امیج پلے گراؤنڈ سے تیار کی گئی ہر تصویر میں سنتھ آئی ڈی واٹرمارک لازمی طور پر شامل کیا جائے گا۔

یہ پیش رفت ایسی صورتحال میں سامنے آئی ہے جب مصنوعی ذہانت سے تخلیق شدہ تصاویر اور ویڈیوز کی اصل شناخت کا مسئلہ دنیا بھر میں سنگین تشویش کا باعث بنا ہوا ہے۔ ایپل اور گوگل کے درمیان اس تعاون سے صارفین کو یہ سہولت ملے گی کہ وہ کسی بھی تصویر کے اے آئی سے بننے یا نہ بننے کی تصدیق کر سکیں، جس سے ڈیجیٹل مواد کی شفافیت اور اعتبار میں اضافہ متوقع ہے۔

ٹیکنالوجی ماہرین کے مطابق اے آئی مواد کی نشاندہی کے لیے اس طرح کے واٹرمارک کا نظام مستقبل میں مزید اہمیت اختیار کرے گا، کیونکہ جعلی تصاویر اور گمراہ کن مواد انٹرنیٹ پر تیزی سے پھیل رہا ہے۔ ایپل کی جانب سے گوگل کے اس معیار کو اپنانا اس بات کی نشاندہی کرتا ہے کہ بڑی ٹیکنالوجی کمپنیاں ڈیجیٹل مواد کی اصلیت کو یقینی بنانے کے لیے مشترکہ حل کی طرف بڑھ رہی ہیں۔