ترک خاتون کو تھپڑ مارنے کا واقعہ لندن کا نہیں، ملزم پاکستانی ہونے کا دعویٰ غلط ثابت

سوشل میڈیا پر ایک ویڈیو تیزی سے وائرل ہو رہی ہے جس میں یہ دعویٰ کیا جا رہا ہے کہ لندن میں ایک پاکستانی شخص نے ایک ترکی خاتون کو بلاوجہ تھپڑ مارا جس کے بعد پولیس نے اسے گرفتار کر لیا۔ یہ ویڈیو انسٹاگرام کے ایک اکاؤنٹ کی جانب سے شیئر کی گئی ہے، جس میں کہا گیا کہ یہ واقعہ کسی اشتعال کے بغیر پیش آیا اور سی سی ٹی وی فوٹیج میں بھی خاتون کو فٹ پاتھ پر کھڑے دیکھا جا سکتا ہے۔ پوسٹ میں اس واقعے کو لندن میں سیاحوں کی حفاظت سے بھی جوڑا گیا۔

تاہم اس دعوے کی مستند ذرائع سے تصدیق نہیں ہوتی۔ ترکی کی خبر رساں ایجنسی ڈیمیرورین کی رپورٹ کے مطابق یہ واقعہ یکم نومبر کو ترکیہ میں پیش آیا، جہاں ایک 46 سالہ خاتون ایک مارکیٹ کے باہر کھڑی تھیں کہ ایک شخص نے پیچھے سے آکر ان کے بائیں کان پر زور دار تھپڑ مارا۔ حملے کے نتیجے میں خاتون کی سماعت متاثر ہوئی، جبکہ واقعہ قریبی دکان کے سی سی ٹی وی کیمرے میں بھی ریکارڈ ہوا۔

پولیس نے ملزم کی شناخت 38 سالہ تولگا چیلیک کے نام سے کی، جس کے خلاف پہلے سے چھ مختلف جرائم کا ریکارڈ موجود ہے۔ ملزم نے تفتیش کے دوران مؤقف اختیار کیا کہ اس کا ہاتھ غلطی سے خاتون کو لگا، تاہم عدالت نے اسے جان بوجھ کر زخمی کرنے کے الزام میں جیل بھیج دیا۔ ڈی ایچ اے، انادولو ایجنسی اور آئی ایچ اے کی رپورٹس میں بھی اسی مقام اور اسی ملزم کا ذکر موجود ہے۔

کسی بھی مستند رپورٹ میں اس بات کی تصدیق نہیں کی گئی کہ ملزم پاکستانی شہری ہے یا یہ واقعہ لندن میں پیش آیا ہے۔ اس طرح وائرل پوسٹ میں واقعے کو لندن سے منسوب کرنا اور ملزم کو پاکستانی قرار دینا دونوں غیر مصدقہ اور گمراہ کن دعوے ہیں۔

یہ واقعہ اس بات کی مثال ہے کہ سوشل میڈیا پر شیئر کی گئی ویڈیوز کے ساتھ دیے گئے دعوے ہمیشہ درست نہیں ہوتے۔ صارفین کو چاہیے کہ ایسی خبروں کو آگے بھیجنے سے پہلے مستند ذرائع سے تصدیق کریں، تاکہ غلط معلومات کے پھیلاؤ کو روکا جا سکے۔