ٹرمپ کا ایران کے خلاف ’شدید ضرب‘ لگانے کا اشارہ، جوہری پروگرام پر سخت مؤقف برقرار

امریکی صدر ڈونلڈ ٹرمپ نے ایران کے حوالے سے سخت بیان دیتے ہوئے کہا ہے کہ امریکا کو کوئی بڑا اقدام کرنا ہوگا اور اس میں ایران کے خلاف شدید حملہ بھی شامل ہو سکتا ہے۔ یہ بیان انہیں فاکس نیوز کو دیے گئے ایک انٹرویو کے دوران دیا، جس میں ایران کے بعض علاقوں پر ممکنہ امریکی فوجی کارروائی سے متعلق رپورٹس پر بھی بات کی گئی۔

ٹرمپ نے انٹرویو میں دوبارہ اپنا سخت مؤقف دہراتے ہوئے کہا کہ ایران کبھی جوہری ہتھیار حاصل نہیں کر سکے گا اور امریکا اسے ایسا کرنے کی اجازت نہیں دے گا۔ ان کے اس بیان میں ایران کے جوہری پروگرام کو روکنے کے عزم اور ممکنہ فوجی کارروائی کے اشارے دونوں نمایاں تھے۔

واضح رہے کہ یہ بیان ایسے وقت میں سامنے آیا ہے جب خطے میں کشیدگی کے حوالے سے مختلف رپورٹس گردش کر رہی ہیں۔ تاہم ٹرمپ نے کسی مخصوص فوجی منصوبے یا وقت کا ذکر نہیں کیا اور نہ ہی اس حوالے سے کوئی حتمی فیصلہ ظاہر کیا۔

اسی انٹرویو میں امریکی صدر نے ملکی سیاست پر بھی بات کی اور امریکی وسط مدتی انتخابات میں ریپبلکن پارٹی کی کمزور کارکردگی کا اعتراف کیا۔ انہوں نے کہا کہ پٹرول کی بڑھتی ہوئی قیمتوں نے انتخابی نتائج پر اثر ڈالا، کیونکہ ووٹرز ایندھن پر زیادہ رقم خرچ کرنا پسند نہیں کرتے۔

ٹرمپ کے اس بیان کو بین الاقوامی سطح پر اہمیت حاصل ہے، کیونکہ ایران کے جوہری معاملے پر امریکی پالیسی طویل عرصے سے عالمی سیاست کا مرکزی موضوع رہی ہے۔ ماہرین کے مطابق اس طرح کے بیانات خطے میں کشیدگی کو متاثر کر سکتے ہیں، تاہم اس وقت کوئی عملی فوجی پیش رفت سامنے نہیں آئی۔

گزشتہ برسوں میں ایران اور امریکا کے تعلقات میں اتار چڑھاؤ جاری رہا ہے اور جوہری معاہدے کے حوالے سے مذاکرات مختلف مراحل سے گزرے ہیں۔ موجودہ صورتحال میں ٹرمپ کا یہ بیان اس بات کا اشارہ ہے کہ واشنگٹن ایران کے حوالے سے اپنا سخت رویہ برقرار رکھنے کا ارادہ رکھتا ہے۔