لاہور میں 24ویں انٹرنیشنل ٹریڈ اینڈ انڈسٹریل فیئر ایشیا 2026 کا انعقاد، سرمایہ کاری کے نئے مواقع

لاہور میں رواں سال 4 سے 6 نومبر تک 24ویں انٹرنیشنل ٹریڈ اینڈ انڈسٹریل فیئر ایشیا 2026 کا انعقاد کیا جا رہا ہے، جس کا مقصد ملکی اور غیر ملکی صنعت کاروں اور سرمایہ کاروں کو ایک پلیٹ فارم پر اکٹھا کرنا اور باہمی تجارتی تعاون کو فروغ دینا ہے۔ اس نمائش میں چین سمیت مجموعی طور پر 6 مختلف ممالک کی معروف صنعتی کمپنیاں اور سرمایہ کار بھرپور طریقے سے شرکت کریں گے۔

یہ ایونٹ سندھ انویسٹمنٹ اینڈ فوریئن ٹریڈ اتھارٹی اور ای کامرس گیٹ وے کے اشتراک سے منعقد کیا جا رہا ہے۔ منتظمین کے مطابق اس نمائش کا بنیادی مقصد پاکستان میں صنعتی ترقی کو آگے بڑھانا، مقامی کاروباروں کو بین الاقوامی مارکیٹ سے جوڑنا اور مشترکہ سرمایہ کاری کے لیے سازگار ماحول فراہم کرنا ہے۔

انٹرنیشنل ٹریڈ اینڈ انڈسٹریل فیئر کے ساتھ ساتھ سولر، پی وی اینڈ انرجی اسٹوریج ایشیا اور فائر اینڈ سیفٹی ایشیا کے الگ الگ ایکسپوز بھی منعقد کیے جائیں گے۔ ان ایکسپوز میں شمسی توانائی، توانائی ذخیرہ کرنے کے نظام اور جدید حفاظتی آلات پر خصوصی توجہ دی جائے گی، جو ملک میں قابلِ تجدید توانائی کے بڑھتے ہوئے رجحان اور صنعتی حفاظت کی اہمیت کو اجاگر کرتے ہیں۔

نمائش میں صنعتی مشینری، لیزر کٹنگ ٹیکنالوجی، شمسی توانائی کے آلات، الیکٹرک گاڑیوں، معدنیات اور جدید حفاظتی سازوسامان کی نمائش کی جائے گی۔ ماہرین کے مطابق اس طرح کے بین الاقوامی پلیٹ فارمز سے مقامی صنعت کاروں کو نئی ٹیکنالوجی تک رسائی، تجارتی روابط کے فروغ اور مشترکہ منصوبوں کے مواقع میسر آتے ہیں، جس سے ملکی معیشت اور برآمدات کو بھی تقویت مل سکتی ہے۔

یہ نمائش پاکستان کی صنعتی اور اقتصادی ترقی کے حوالے سے اہمیت کی حامل ہے، کیونکہ اس سے نہ صرف غیر ملکی سرمایہ کاری کی راہیں کھلتی ہیں بلکہ مقامی کمپنیوں کو عالمی سطح پر اپنی مصنوعات متعارف کرانے کا موقع بھی ملتا ہے۔ تجارتی حلقوں نے توقع ظاہر کی ہے کہ اس ایونٹ سے توانائی، تعمیرات اور صنعتی شعبے میں طویل المدتی شراکت داری کے نئے دروازے کھلیں گے۔