واٹس ایپ نے گروپ چیٹ کے لیے چار نئے فیچرز متعارف کرا دیے

انسٹنٹ میسجنگ ایپ واٹس ایپ نے گروپ چیٹس کو مزید منظم اور مؤثر بنانے کے لیے چار نئے فیچرز متعارف کرانے کا اعلان کیا ہے۔ کمپنی کے مطابق ان سہولیات کا مقصد صارفین کے لیے رابطے اور معلومات کے تبادلے کو آسان بنانا ہے، خصوصاً ان صارفین کے لیے جو بڑے گروپس کا حصہ ہوتے ہیں۔

پہلا فیچر چیٹ لسٹ کے فلٹر مینو سے متعلق ہے۔ چیٹ لسٹ میں نیچے کی جانب سوائپ کرنے پر ظاہر ہونے والے فلٹر مینو میں اب ’مینشنز اینڈ ریپلائیز‘ کا نیا آپشن شامل ہوگا۔ اس کی مدد سے صارفین صرف ان گروپ چیٹس کو دیکھ سکیں گے جہاں انہیں مینشن کیا گیا ہو یا ان کے پیغامات کا براہِ راست جواب دیا گیا ہو۔ اس میں گروپ کے تمام ارکان کے لیے بھیجے گئے @all پیغامات بھی شامل ہوں گے۔

دوسری سہولت کے تحت صارفین گروپ چیٹس کے پیغامات کو غیر معینہ مدت تک پن کر سکیں گے۔ اس سے قبل یہ اختیار صرف 24 گھنٹے، 7 دن یا 30 دن کی محدود مدت کے لیے دستیاب تھا، جس سے اہم ہدایات یا معلومات عرصہ گزرنے پر خود بخود ان پن ہو جاتی تھیں۔

تیسرا فیچر نئے ارکان کو گروپ کی حالیہ گفتگو سے آگاہ کرنے سے متعلق ہے۔ اب کسی نئے رکن کے گروپ میں شامل ہونے کے بعد اسے پہلے سے بھیجے گئے حالیہ پیغامات بھی دکھائے جا سکیں گے، جس کے لیے چیٹ میں متعلقہ رکن کے نام پر ٹیپ کرنا ہوگا۔ پہلے یہ سہولت صرف کسی شخص کو گروپ میں شامل کرتے وقت دستیاب تھی۔

چوتھا فیچر گروپ اسٹیٹس شیئرنگ کا ہے، جس کے ذریعے صارفین اپنی اسٹیٹس اپ ڈیٹس صرف کسی مخصوص گروپ کے ارکان کے ساتھ شیئر کر سکیں گے۔ گروپ کے دیگر ارکان ان اسٹیٹس کو دیکھنے، ان پر ردعمل دینے اور اپنے اسٹیٹس شیئر کرنے کے اہل ہوں گے، جبکہ یہ اسٹیٹس 24 گھنٹے بعد خود بخود غائب ہو جائیں گے۔

واضح رہے کہ واٹس ایپ گزشتہ کچھ عرصے سے گروپ چیٹ کے تجربے کو بہتر بنانے پر توجہ دے رہا ہے تاکہ بڑے گروپس میں اہم پیغامات کھو نہ جائیں اور صارفین کو غیر ضروری اطلاعات سے بچایا جا سکے۔ ان فیچرز کی دستیابی مرحلہ وار ہوگی اور یہ مختلف علاقوں میں وقت کے ساتھ جاری کیے جائیں گے۔