کراچی پورٹ میں جدید ٹیکنالوجی، فی گھنٹہ 25 سے 30 کنٹینرز کی اسکیننگ ممکن

کراچی پورٹ کو جدید خطوط پر استوار کرنے کا عمل تیز کر دیا گیا ہے، جہاں کراچی پورٹ ٹرسٹ (کے پی ٹی) اور کراچی انٹرنیشنل کنٹینر ٹرمینل (کے آئی سی ٹی) کے اشتراک سے بندرگاہی آپریشنز کو بہتر بنانے کے لیے متعدد اقدامات کیے جا رہے ہیں۔ ان اقدامات کا مقصد کارگو کی نقل و حرکت کو تیز کرنا اور بندرگاہ کی مجموعی کارکردگی کو بہتر بنانا ہے۔

کے پی ٹی کے مطابق ٹرمینل آپریٹر کے آئی سی ٹی نے جدید ٹیکنالوجی اور مؤثر رابطہ کاری کے ذریعے پورٹ آپریشنز میں نمایاں بہتری لائی ہے۔ اس سلسلے میں ڈرائیو تھرو این ایل سی اسکیننگ سسٹم متعارف کرایا گیا ہے، جس کے ذریعے اب فی گھنٹہ 25 سے 30 کنٹینرز کی اسکیننگ ممکن ہو گئی ہے۔ اس نظام سے کنٹینرز کی جانچ کے عمل میں تیزی آئے گی اور بندرگاہ پر رکاوٹیں کم ہوں گی۔

یارڈ آپریشنز کو تیز اور ماحول دوست بنانے کے لیے برقی ریچ اسٹیکرز بھی متعارف کرائے گئے ہیں، جبکہ یارڈ میں 27 نئے ٹریلرز شامل کیے گئے ہیں۔ ان اقدامات سے کارگو کی اندرونِ بندرگاہ نقل و حرکت بہتر ہوئی ہے، جس سے کنٹینرز کی ترسیل اور جہازوں کے آپریشنز میں مزید تیزی متوقع ہے۔

کراچی پورٹ پر جدید نظام کے باعث جہازوں کے ٹرن اراؤنڈ ٹائم اور مجموعی پیداواری صلاحیت میں بھی بہتری آ رہی ہے۔ اس کے علاوہ کے آئی سی ٹی ٹرین منصوبے کے تحت کراچی کو لاہور سے جیا باگہ ڈرائی پورٹ کے ذریعے منسلک کیا جا رہا ہے، جس سے مال برداری اور زمینی رابطوں کو فروغ ملے گا۔

بندرگاہ کی سکیورٹی کو مزید مؤثر بنانے کے لیے چہرے کی شناخت پر مبنی ڈیجیٹل تصدیقی نظام بھی متعارف کرایا گیا ہے۔ بیرونی ڈرائیوروں کی بائیومیٹرک رجسٹریشن اور داخلی دروازوں پر فوری تصدیق کا نظام فعال کر دیا گیا ہے، جبکہ اب تک 23 ہزار بیرونی ڈرائیوروں کی رجسٹریشن مکمل کی جا چکی ہے۔

کے پی ٹی کے ترجمان کے مطابق ڈرائیوروں کی ڈیجیٹل تصدیق کو ٹرمینل آپریٹنگ سسٹم سے بھی منسلک کر دیا گیا ہے، جس کے ذریعے بندرگاہ میں داخلے کے عمل کو جدید اور مؤثر بنایا جا رہا ہے۔ یہ اقدامات کراچی پورٹ کو جدید تقاضوں کے مطابق ڈھالنے اور تجارتی سرگرمیوں کو تیز کرنے کی کوششوں کا حصہ ہیں۔