فیڈرل کانسٹیبلری کے اسپیشل پروٹیکشن اور اینٹی رائٹ ونگ کے پہلے بیچ کی پاسنگ آؤٹ پریڈ

ضلع چارسدہ کے علاقے شبقدر میں واقع فیڈرل کانسٹیبلری ٹریننگ سینٹر میں اسپیشل پروٹیکشن ونگ اور اینٹی رائٹ ونگ کے پہلے بیچ کی پاسنگ آؤٹ پریڈ منعقد ہوئی۔ اس پروقار تقریب میں وفاقی وزیر داخلہ محسن نقوی بطور مہمان خصوصی شریک ہوئے، جہاں انہوں نے پریڈ کا معائنہ کیا اور چاک و چوبند دستے نے انہیں سلامی پیش کی۔

ملکی تاریخ میں پہلی مرتبہ چاروں صوبوں کے علاوہ آزاد کشمیر اور گلگت بلتستان سے تعلق رکھنے والے 983 جوانوں نے تربیت مکمل کی، جن میں 35 خواتین بھی شامل ہیں۔ تقریب کے دوران وفاقی وزیر داخلہ نے اسپیشل پروٹیکشن ونگ اور اینٹی رائٹ ونگ کی پیشہ ورانہ تربیت کے مظاہرے بھی دیکھے اور نمایاں کارکردگی دکھانے والے جوانوں میں انعامات تقسیم کیے۔

وفاقی وزیر داخلہ نے جوانوں کی پیشہ ورانہ مہارت کے معیار کو سراہتے ہوئے کہا کہ شاندار پریڈ نے ثابت کیا کہ یہ سب متحد اور منظم ہیں اور اپنے مشن کے لیے پوری طرح تیار ہیں۔ انہوں نے کہا کہ جوانوں کی کارکردگی نہ صرف ان کی عملی تربیت بلکہ ان کے عزم، حوصلے اور ملک کی خدمت کے جذبے کی بھی عکاسی کرتی ہے، اور یہ جوان فیڈرل کانسٹیبلری میں آنے والی بڑی تبدیلی کے عملی نمائندے ہیں۔

محسن نقوی نے کہا کہ فیڈرل کانسٹیبلری، جو پہلے فرنٹیئر کانسٹیبلری کہلاتی تھی، ایسی فورس ہے جس کی تاریخ ایک صدی سے زیادہ پرانی ہے اور یہ اپنے ورثے، روایات اور کردار کی بدولت ہمیشہ نمایاں رہی ہے۔ انہوں نے بتایا کہ یہ فورس بدلتے ہوئے ملکی حالات اور سیکیورٹی چیلنجز کے مطابق خود کو ڈھالتی رہی ہے اور دہشت گردی کے خلاف آپریشنز، سرکاری تنصیبات کی حفاظت، قومی منصوبوں کی سیکیورٹی اور امن و امان کی ذمہ داریوں میں ہمیشہ صف اول میں رہی ہے۔

وزیر داخلہ کے مطابق وزارت داخلہ نے جوانوں کی تربیت اور سہولیات کو بہتر بنانے کے لیے عملی اقدامات کیے ہیں، جن میں شبقدر واقع ایف سی ٹریننگ اکیڈمی کو چوبیس گھنٹے بجلی کی فراہمی یقینی بنانا، جدید سوئمنگ پول کی منظوری اور جوانوں کے لیے عربی اور انگریزی زبانوں کے کورسز شامل ہیں۔ انہوں نے کہا کہ یہ پہلا موقع ہے جب یہ جوان وفاقی حکومت کے لیے اسپیشل پروٹیکشن ونگ اور اینٹی رائٹ ونگ کا حصہ بن رہے ہیں، جو ایک تاریخی ذمہ داری ہے اور ان کی پیشہ ورانہ صلاحیت، تحمل، نظم و ضبط اور فیصلہ سازی حساس حالات میں امن و امان کے قیام میں اہم کردار ادا کرے گی۔

وفاقی وزیر داخلہ نے انسپکٹر جنرل فیڈرل کانسٹیبلری اور ان کی پوری ٹیم کو مبارکباد پیش کی اور کہا کہ آج کی شاندار پریڈ اور جوانوں کی اعلیٰ تربیت ان سب کی محنت، قیادت اور لگن کا منہ بولتا ثبوت ہے۔ انہوں نے تمام پاس آؤٹ ہونے والے جوانوں کو دلی مبارکباد دیتے ہوئے کہا کہ وہ عزت، ایمانداری اور ذمہ داری کے ساتھ ملک کی خدمت کریں، کیونکہ پاکستان کو ان پر فخر ہے۔