راولاکوٹ میں بچی کی ہلاکت کے واقعے پر پروپیگنڈا سازش بے نقاب، آڈیو لیک منظر عام پر

راولاکوٹ میں ایک بچی کی ہلاکت کے واقعے کے حوالے سے ریاستی اداروں کے خلاف جھوٹا بیانیہ تشکیل دینے کی سازش بے نقاب ہو گئی ہے۔ سامنے آنے والی ایک آڈیو لیک نے مبینہ طور پر شرپسند عناصر کے منصوبے کو واضح کر دیا ہے، جس سے یہ بات سامنے آئی ہے کہ واقعے کو حقیقت سے ہٹ کر پیش کرنے کی کوشش کی جا رہی تھی۔

آڈیو ریکارڈنگ میں مبینہ طور پر یہ اعتراف کیا گیا ہے کہ بچیوں پر فائرنگ کا واقعہ خود انہی کے مسلح کارکنوں کی جانب سے پیش آیا۔ ریکارڈنگ کے مطابق شرپسند عناصر کی یہ منصوبہ بندی سامنے آئی ہے کہ واقعے کا ذمہ دار سیکیورٹی فورسز کو ٹھہرایا جائے تاکہ ریاستی اداروں کے خلاف مہم کو تقویت دی جا سکے۔

لیک ہونے والی آڈیو میں یہ بھی انکشاف ہوا ہے کہ متاثرہ خاندان کو دباؤ میں لا کر ان سے من پسند بیان دلوانے کی کوشش کی گئی۔ اس کے علاوہ سوشل میڈیا پر جھوٹی ویڈیوز اور پوسٹوں کے ذریعے ریاستی اداروں کو بدنام کرنے کی مہم بھی چلائی گئی، جس کا مقصد عوامی رائے کو گمراہ کرنا تھا۔

یاد رہے کہ راولاکوٹ میں جویریہ ثاقب نامی بچی کی المناک موت کے بعد سوشل میڈیا پر مختلف بیانیے گردش کر رہے تھے۔ تازہ انکشافات کے بعد معصوم بچی کے خون اور سوشل میڈیا پر چلائی جانے والی گمراہ کن مہم کے پس پردہ مقاصد پر سوالات اٹھائے جا رہے ہیں۔

واقعے کی نوعیت اور سوشل میڈیا پر پھیلائی جانے والی اطلاعات کے پیش نظر ماہرین نے شہریوں کو مشورہ دیا ہے کہ وہ کسی بھی خبر کی تصدیق سے قبل اسے شیئر نہ کریں۔ غیر مصدقہ مواد نہ صرف عوامی تحفظ کے لیے خطرہ بن سکتا ہے بلکہ ریاستی اداروں کے خلاف غلط فہمیوں کو بھی ہوا دے سکتا ہے۔

واضح رہے کہ آزاد جموں و کشمیر سمیت ملک بھر میں امن و امان کی صورتحال کو درپیش چیلنجز کے دوران ذمہ دارانہ صحافت اور تصدیق شدہ معلومات کی اہمیت مزید بڑھ جاتی ہے۔ متعلقہ حکام کی جانب سے اس معاملے کی مکمل تحقیقات اور حقائق کی روشنی میں اقدامات متوقع ہیں۔