کراچی میں پانی کی فراہمی معمول پر بحال، دھابیجی اور پپری کے تمام پمپس فعال

کراچی واٹر اینڈ سیوریج کارپوریشن نے اعلان کیا ہے کہ شہر میں پانی کی فراہمی معمول کے مطابق بحال کردی گئی ہے۔ ترجمان کے مطابق دھابیجی اور پپری پمپنگ اسٹیشنز پر سالانہ شٹ ڈاؤن کے دوران ضروری مرمتی اور ترقیاتی کام مکمل کیے گئے، جس کے بعد دونوں اسٹیشنز کے تمام پمپس دوبارہ فعال ہوگئے ہیں۔

ترجمان واٹر کارپوریشن کے مطابق دھابیجی اسٹیشن پر 60 انچ قطر کا نیا والو نصب کیا گیا اور تمام پمپ ہاؤسز کی سالانہ مینٹیننس بھی مکمل کی گئی۔ اس کے علاوہ دھابیجی کے آپریٹنگ سسٹم سے متعلق ضروری مرمتی کام، لائن نمبر ایک کے والو کی مرمت اور اسٹاف کالونی کی اندرونی پانی کی لائن کی مرمت بھی مکمل کرلی گئی ہے۔

پپری پمپنگ اسٹیشن پر بھی تمام پمپ ہاؤسز کی سالانہ مینٹیننس اور آپریٹنگ سسٹم سے متعلق مرمتی کام مکمل کیا گیا۔ ترجمان کے مطابق شاہراہِ بھٹو کی الائنمنٹ میں 32 انچ قطر کی 150 فٹ طویل پانی کی لائن تبدیل کی گئی اور نئی لائن پر بٹر فلائی والو بھی نصب کیا گیا، جبکہ ہالیجی کنڈیوٹ میں پانی کی لائن کی لیکیج کی مرمت بھی مکمل کرلی گئی۔

واٹر کارپوریشن کے مطابق دھابیجی کے تمام پمپس فعال ہونے کے بعد کراچی کو پانی کی فراہمی معمول کے مطابق بحال کردی گئی ہے۔ لانڈھی، کورنگی، ملیر اور شاہ فیصل ٹاؤن میں پانی کی فراہمی بتدریج معمول پر آرہی ہے اور شہریوں کو پانی کی دستیابی میں بہتری محسوس ہو رہی ہے۔

یاد رہے کہ سالانہ شٹ ڈاؤن کے دوران پانی کی فراہمی میں کمی واقع ہوتی ہے، جس سے شہریوں کو عارضی مشکلات کا سامنا کرنا پڑتا ہے۔ واٹر کارپوریشن کا کہنا ہے کہ اس بار شٹ ڈاؤن کے دوران کیے گئے مرمتی کام سے آئندہ کے لیے پانی کی فراہمی کے نظام کو مستحکم کرنے میں مدد ملے گی اور پرانی لائنوں میں لیکیج جیسے مسائل کم ہوں گے۔

ماہرین کے مطابق کراچی جیسے بڑے شہر میں پانی کی فراہمی کا نظام پرانی لائنوں اور کمزور انفراسٹرکچر کی وجہ سے متاثر رہتا ہے، اس لیے وقتاً فوقتاً مرمت اور نئی لائنوں کی تنصیب ناگزیر ہے۔ واٹر کارپوریشن نے شہریوں سے گزارش کی ہے کہ وہ پانی کے ضیاع کو روکنے میں تعاون کریں تاکہ تمام علاقوں میں فراہمی بہتر رہے۔