خیبر پختونخوا میں غیر قانونی کان کنی کے خلاف بڑے آپریشن، بھاری مشینری تباہ

خیبر پختونخوا میں قانون کی عملداری یقینی بنانے کے لیے صوبائی حکومت اور انتظامیہ سرگرم عمل ہیں۔ اس سلسلے میں صوبے میں گورنر راج کے نفاذ کے بعد غیر قانونی سرگرمیوں کے خلاف کارروائیاں تیز کر دی گئی ہیں۔

صوبائی حکومت نے غیر قانونی طور پر قدرتی وسائل کی لوٹ مار کرنے والوں کے خلاف بڑا اقدام کیا ہے۔ خیبر پختونخوا پولیس اور ضلعی انتظامیہ نے نوشہرہ اور کوہاٹ میں غیر قانونی سونے کی کان کنی مافیا کے خلاف گرینڈ آپریشن کیا۔

آپریشن کے دوران غیر قانونی کان کنی میں استعمال ہونے والی تمام بھاری مشینری نذر آتش کر دی گئی۔ کارروائی کے دوران ملوث عناصر کے قبضے سے بھاری نقدی اور غیر قانونی کان کنی کا سامان بھی برآمد ہوا۔

غیر قانونی کان کنی مافیا کے خلاف اس گرینڈ آپریشن میں کے پی پولیس کے بہادر جوانوں نے فرض کی ادائیگی کے دوران جام شہادت بھی نوش کیا۔ حکام کے مطابق صوبے میں قانون کی عملداری کو یقینی بنانے کے لیے صوبائی حکومت اور انتظامیہ ہر ممکن اقدام کر رہی ہے۔

یاد رہے کہ خیبر پختونخوا میں گورنر راج کے نفاذ کے بعد غیر قانونی سرگرمیوں کے خلاف کارروائیوں میں تیزی آئی ہے، جس کا مقصد صوبے میں امن و امان کی صورتحال کو بہتر بنانا اور قدرتی وسائل کا تحفظ یقینی بنانا ہے۔