خیبرپختونخوا: سونے کی کانوں کی تمام لیزیں منسوخ کرنے کا اعلان، ٹھیکیداروں کو ایک ہفتے میں علاقہ خالی کرنے کی ہدایت
گورنر فیصل کریم کنڈی نے کہا ہے کہ صوبے میں سونے کی کان کنی کی تمام لیزیں معطل اور منسوخ کی جا رہی ہیں، کوہاٹ میں غیر قانونی کان کنی سے ماہانہ تقریباً 90 کلوگرام سونا نکالا جا رہا تھا جس کی آمدن کا بڑا حصہ ملک مخالف سرگرمیوں میں استعمال ہوتا رہا۔
یہ خبر اور ہر اہم خبر سب سے پہلے واٹس ایپ پر پائیںaround.pk اردو خبریں چینل — مفت، بغیر سپیم فالو کریں
خیبرپختونخوا کے گورنر فیصل کریم کنڈی نے اعلان کیا ہے کہ صوبے میں سونے کی کان کنی کی تمام لیزیں معطل اور منسوخ کی جا رہی ہیں۔ پشاور میں پریس کانفرنس سے خطاب کرتے ہوئے انہوں نے بتایا کہ ٹھیکیداروں کو ایک ہفتے کے اندر متعلقہ علاقے خالی کرنے کی ہدایت دی گئی ہے، ورنہ ان کی مشینری ضبط کر لی جائے گی۔ ان کا کہنا تھا کہ صوبے کے معدنی ذخائر کا تحفظ ہر صورت یقینی بنایا جائے گا اور کسی کو سرکاری وسائل پر قبضے کی اجازت نہیں دی جائے گی۔
گورنر نے کہا کہ کوہاٹ میں ماہانہ تقریباً 90 کلوگرام سونا نکالا جا رہا تھا اور اس کاروبار سے ہر ماہ تقریباً چار ارب بیس کروڑ روپے کا تخمینہ لگایا گیا تھا۔ ان کے مطابق اس غیر قانونی سرگرمی میں تقریباً تین ہزار ایکسکیویٹرز، سولہ سو ڈمپرز اور دو سو ہیوی لوڈرز استعمال ہو رہے تھے جبکہ کان کنی کے کام سے تقریباً انچاس ہزار افراد وابستہ تھے۔ انہوں نے الزام لگایا کہ اس آمدن کا بڑا حصہ، تقریباً اسی فیصد، افغانستان منتقل کیا جا رہا تھا اور یہ رقم ملک مخالف سرگرمیوں اور دہشت گردی کے لیے استعمال ہوتی رہی۔
انہوں نے مزید کہا کہ کوہاٹ میں غیر قانونی کان کنی کے خلاف جاری آپریشن کے دوران سیکیورٹی اہلکاروں کا دہشت گردوں سے سامنا ہوا، جس میں دس سیکیورٹی اہلکاروں نے جام شہادت نوش کیا جبکہ کارروائی میں اٹھارہ دہشت گرد مارے گئے۔ گورنر کا کہنا تھا کہ کان کنی مافیا اور دہشت گردوں کے درمیان گٹھ جوڑ موجود تھا اور اہلکاروں پر حملہ کرنے والے گروہ کو کسی صورت نہیں چھوڑا جائے گا۔
فیصل کریم کنڈی نے بتایا کہ اسلام آباد میں منعقدہ پاکستان منرلز انویسٹمنٹ فورم کامیاب رہا، جس میں دنیا بھر سے وفود اور تمام صوبوں کی نمائندگی شامل تھی۔ انہوں نے کہا کہ خیبرپختونخوا میں معدنیات کے وسیع ذخائر موجود ہیں اور بین الاقوامی سرمایہ کاروں کو صوبے میں سرمایہ کاری کی دعوت دی جاتی ہے۔ ان کے مطابق تھوکول اور ریکوڈک سے بہتر معاہدہ خیبرپختونخوا میں کرنے کی کوشش کی جائے گی تاکہ صوبے کے لوگوں کو ان کے وسائل کا حقیقی فائدہ مل سکے۔
انہوں نے الزام لگایا کہ گزشتہ تیرہ سال سے صوبے کے وسائل کو لوٹا جاتا رہا ہے، تاہم ان کا کہنا تھا کہ معدنیات کے معاملے پر بعض عناصر بلاوجہ پروپیگنڈا کر رہے ہیں جبکہ صوبے کے وسائل کہیں منتقل نہیں کیے جا رہے۔ گورنر نے واضح کیا کہ اب صوبے میں سزا اور جزا کا نظام نافذ ہوگا اور غیر قانونی سرگرمیوں میں ملوث کسی شخص کو، سیاسی ہو یا غیر سیاسی، رعایت نہیں دی جائے گی۔ انہوں نے کہا کہ دہشت گردی کے خلاف جنگ میں ہم اپنی کشتیاں جلا چکے ہیں اور شکست ہماری لغت میں نہیں ہے۔
اب تک کی کہانی پاکستان منرلز انویسٹمنٹ فورم
- پاکستان کو عالمی معدنی قوت بنانے کا مطالبہ، عوام نے حکومت سے فوری اقدامات پر زور دے دیا
- چاغی میں سونے اور تانبے کی تلاش کے لیے آئیون ہو مائنز اور ماڑی منرلز کے درمیان معاہدہ
- خیبر پختونخوا میں معدنیات کی تلاش کے لیے سرمایہ کاروں کو دعوت، ون ونڈو سہولت کا وعدہ
- پاکستان معدنی شعبے میں عالمی سرمایہ کاری کے لیے نئی راہیں کھولنے کو تیار
