آئرلینڈ میں عالمی رہنماؤں کے عشائیے کے مقام کے قریب بم برآمد، ناکارہ بنا دیا گیا

آئرلینڈ کے دارالحکومت ڈبلن میں یورپی سیاسی برادری کے سربراہی اجلاس کے دوران ایک اہم سکیورٹی واقعہ پیش آیا، جہاں عالمی رہنماؤں کے اعزاز میں دیے گئے عشائیے کے مقام کے قریب ایک مشتبہ دھماکا خیز آلہ برآمد ہوا۔ پولیس کو میریئن اسکوائر پر واقع ایک دفتر کی عمارت میں مشتبہ چیز موجود ہونے کی اطلاع ملی، جس کے بعد فوری طور پر کارروائی شروع کی گئی۔

آئرش پولیس کے مطابق ابتدائی جائزے کے بعد دفاعی افواج کی ایکسپلوسیو آرڈیننس ڈسپوزل ٹیم کو طلب کیا گیا۔ فوجی ماہرین نے موقع پر پہنچ کر آلے کا معائنہ کیا اور اسے محفوظ طریقے سے ناکارہ بنا دیا۔ پولیس نے بیان میں بتایا کہ دھماکا خیز آلہ ابتدائی طور پر سادہ ساخت کا مگر قابلِ استعمال قرار دیا گیا ہے، تاہم یہ واضح نہیں کیا گیا کہ مواد عمارت میں کب رکھا گیا اور اس کے پیچھے کون ملوث ہو سکتا ہے۔

یہ واقعہ ایسے وقت سامنے آیا جب ایک روز قبل اسی علاقے میں منعقدہ سربراہی اجلاس میں شریک عالمی رہنماؤں کے اعزاز میں نیشنل گیلری آف آئرلینڈ میں عشائیہ دیا گیا تھا۔ آئرش وزیراعظم میہال مارٹن کی میزبانی میں ہونے والی اس تقریب میں فرانس کے صدر ایمانوئل میکرون، برطانوی وزیراعظم اینڈی برنہم اور کینیڈا کے وزیراعظم مارک کارنی سمیت تقریباً 50 رہنماؤں نے شرکت کی۔

عشائیے کے موقع پر علاقے میں سخت سکیورٹی انتظامات کیے گئے تھے اور متعدد سڑکیں ٹریفک کے لیے بند کر دی گئی تھیں۔ آئرش پولیس کے مطابق دو روزہ سربراہی اجلاس کے دوران ملک کی تاریخ کا سب سے بڑا سکیورٹی آپریشن کیا گیا، جس کے باعث اس واقعے نے انتظامات پر سوالیہ نشان کھڑے کر دیے ہیں۔

حکام نے تاحال کسی گرفتاری، ممکنہ محرک یا عالمی رہنماؤں کو نشانہ بنانے کی کسی سازش کے بارے میں کوئی تفصیل جاری نہیں کی ہے اور تحقیقات جاری ہیں۔ واضح رہے کہ سربراہی اجلاس میں شریک وفود کو کوئی نقصان نہیں پہنچا اور تقریبات بغیر کسی خلل کے مکمل ہوئیں۔

یاد رہے کہ آئرلینڈ میں اس قسم کے بین الاقوامی اجلاسوں کے دوران سکیورٹی کے غیرمعمولی انتظامات معمول کا حصہ ہوتے ہیں، تاہم کسی بھی مشتبہ چیز کی اطلاع ملنے پر فوری ردعمل اور عوامی تحفظ کو یقینی بنانا حکام کی اولین ترجیح قرار دیا جاتا ہے۔ اس واقعے کی مکمل تحقیقات کے نتائج آنے تک مزید تفصیلات کا انتظار ہے۔