مشرقِ وسطیٰ میں کشیدگی پر روس اور چین کا تحفظات کا اظہار، سفارت کاری پر زور

اقوام متحدہ میں روس اور چین نے مشرقِ وسطیٰ کی بگڑتی صورتِ حال پر گہری تشویش کا اظہار کرتے ہوئے ایران کے خلاف ممکنہ فوجی کارروائی کی دھمکیوں کو خطرے کی گھنٹی قرار دیا ہے۔ دونوں ممالک نے زور دیا ہے کہ خطے میں پائیدار امن کے لیے فوجی راستہ نہیں بلکہ سیاسی اور سفارتی بات چیت ہی مؤثر حل فراہم کر سکتی ہے۔

ایرانی خبر رساں ادارے ارنا کے مطابق اقوام متحدہ میں روس اور چین کے سفیروں نے مشرقِ وسطیٰ کی صورتِ حال کے حوالے سے سلامتی کونسل کے اجلاس میں اپنا مؤقف پیش کیا۔ یہ اجلاس جمعے کے روز بحرین کی درخواست پر منعقد کیا گیا، جس میں خطے میں بڑھتی ہوئی کشیدگی کے مختلف پہلوؤں کا جائزہ لیا گیا۔

اقوام متحدہ میں چین کے سفیر فو کونگ نے اجلاس سے خطاب کرتے ہوئے خبردار کیا کہ مشرقِ وسطیٰ میں بڑے پیمانے پر جنگ چھڑنے کا خطرہ اب بھی بلند ہے۔ ان کا کہنا تھا کہ ایران کے خلاف دوبارہ فوجی کارروائیوں کے امکان سے متعلق حالیہ بیانات خاص طور پر تشویش ناک ہیں اور ایسی گفتگو خطے کو مزید غیر یقینی صورتحال کی طرف دھکیل سکتی ہے۔

چینی سفیر نے اس امر پر زور دیا کہ کشیدگی میں کمی لانے اور خطے میں امن کے قیام کے لیے سیاسی اور سفارتی ذرائع کو ترجیح دی جانی چاہیے۔ ان کے مطابق فریقین کے درمیان مکالمے اور بات چیت ہی وہ واحد راستہ ہے جو طویل المدتی استحکام کو یقینی بنا سکتا ہے۔

ارنا کی رپورٹ کے مطابق روس اور چین کے نمائندوں نے ایران کے خلاف جنگ کو فوری طور پر ختم کرنے اور تنازعے کا حل مذاکرات کے ذریعے تلاش کرنے کی ضرورت پر بھی زور دیا۔ دونوں ممالک کا مؤقف ہے کہ دوبارہ فوجی محاذ آرائی خطے کو ایک بڑے بحران کی طرف دھکیل سکتی ہے، جس کے اثرات عالمی سطح پر بھی محسوس کیے جا سکتے ہیں۔

واضح رہے کہ مشرقِ وسطیٰ کی صورتحال پر اقوام متحدہ کی سلامتی کونسل میں یہ بحث ایسے وقت میں ہوئی ہے جب خطے میں کشیدگی کے آثار مسلسل بڑھ رہے ہیں اور مختلف ممالک کے درمیان تنازعے کے حل کے لیے سفارتی کوششیں جاری ہیں۔ روس اور چین کا یہ مشترکہ مؤقف اس بات کی نشاندہی کرتا ہے کہ عالمی برادری کی ایک بڑی تعداد فوجی حل کے بجائے پرامن مذاکرات کو ترجیح دیتی ہے۔