ٹرمپ نے ایران کے خلاف نئی فوجی کارروائی روکنے کا فیصلہ کیا، سعودی اور ترکیہ کی اپیل اہم قرار دی گئی

امریکی صدر ڈونلڈ ٹرمپ نے ایران کے خلاف مزید فوجی کارروائی روکنے پر غور شروع کر دیا ہے۔ خبر رساں ادارے رائٹرز کے مطابق ٹرمپ نے اپنے سینئر مشیروں کو بتایا کہ اگر ایران یا یمن کے حوثی باغیوں کی جانب سے کوئی نئی اشتعال انگیزی نہ ہوئی تو امریکا فی الحال حملہ نہیں کرے گا۔ اس معاملے سے واقف تین افراد نے نام ظاہر نہ کرنے کی شرط پر بتایا کہ امریکی صدر نے ابھی کوئی حتمی فیصلہ نہیں کیا۔

رپورٹس کے مطابق سعودی ولی عہد شہزادہ محمد بن سلمان اور ترکیہ کے صدر رجب طیب اردوان نے بھی ٹرمپ پر زور دیا ہے کہ وہ ایران کے خلاف فوجی کارروائیاں دوبارہ شروع نہ کریں اور خطے میں کشیدگی کم کرنے کا راستہ اختیار کریں۔ دوسری جانب اسرائیلی حکام امریکا پر مسلسل دباؤ ڈال رہے ہیں کہ ایران کے خلاف نئی فوجی مہم شروع کی جائے۔

رائٹرز کے مطابق امریکی فوج کسی بھی ممکنہ کارروائی کے لیے تیار ہے اور ایک تیسرا طیارہ بردار بحری جہاز بھی مشرق وسطیٰ کی جانب روانہ کیا جا رہا ہے، جس سے خطے میں امریکی فوجی موجودگی مزید بڑھ سکتی ہے۔ امریکی انٹیلی جنس حکام کے جائزوں کے مطابق اقتصادی پابندیاں اور بحری ناکہ بندی ایران پر دباؤ ڈال رہی ہیں، تاہم نئے فضائی حملوں سے تہران کے مذاکراتی مؤقف میں نمایاں تبدیلی آنے کا امکان کم ہے۔

خیال رہے کہ مشرق وسطیٰ میں بڑی جنگ کے خطرے کے پس منظر میں روس اور چین نے بھی امریکا اور اسرائیل کو خبردار کیا ہے۔ اس صورتحال میں خطے میں کشیدگی میں کمی یا اضافے کا انحصار آنے والے دنوں میں ہونے والی سفارتی پیش رفت اور فریقین کے رویے پر ہوگا۔