پاکستان کو عالمی معدنی قوت بنانے کا مطالبہ، عوام نے حکومت سے فوری اقدامات پر زور دے دیا

پاکستان میں معدنیات کے شعبے کو معیشت کی مضبوطی کا اہم ستون قرار دیتے ہوئے عوام نے حکومت سے مطالبہ کیا ہے کہ ملک کے وسیع معدنی ذخائر کو بروئے کار لا کر پاکستان کو عالمی معدنی قوت بنانے کے لیے ہنگامی بنیادوں پر عملی اقدامات کیے جائیں۔ یہ مطالبہ ایسے وقت میں سامنے آیا ہے جب ملک میں جاری پاکستان منرلز انویسٹمنٹ فورم میں 60 سے زائد ممالک کی شرکت نے عالمی سرمایہ کاروں کی بڑھتی ہوئی دلچسپی کو واضح کر دیا ہے۔

شہریوں کا کہنا ہے کہ معیشت کو اپنے پاؤں پر کھڑا کرنے اور معدنیات کے شعبے میں غیر ملکی سرمایہ کاری لانے کی کاوشیں قابلِ تحسین ہیں۔ ان کے مطابق بلوچستان اور خیبرپختونخوا میں موجود سونے اور تانبے کے ذخائر کو جدید ٹیکنالوجی کے ذریعے استعمال میں لا کر ملکی معیشت کو مستحکم بنایا جا سکتا ہے اور درآمدات پر انحصار کم کیا جا سکتا ہے۔

عوام کا ماننا ہے کہ حکومت کی مؤثر پالیسیوں اور معدنی منصوبوں کی بدولت مقامی آبادی کے لیے روزگار کے نئے مواقع پیدا ہوں گے، جبکہ ان علاقوں میں بنیادی ڈھانچے کی بہتری بھی ممکن ہو گی۔ انہوں نے زور دیا کہ معدنی منصوبوں میں شفافیت اور مقامی سطح پر صلاحیتوں کی تربیت کو یقینی بنایا جائے تاکہ ثمرات زیادہ سے زیادہ لوگوں تک پہنچ سکیں۔

شہریوں کے مطابق عالمی سرمایہ کاری اور جدید ٹیکنالوجی کا مؤثر استعمال پاکستان کی معاشی خود انحصاری اور عوامی خوشحالی کے نئے دروازے کھول سکتا ہے۔ انہوں نے کہا کہ معدنی دولت کے حوالے سے پاکستان کی صلاحیت کو عالمی سطح پر اجاگر کرنے کے لیے مستقل طویل المدتی حکمت عملی کی ضرورت ہے، نہ کہ صرف وقتی اقدامات کی۔

معدنیات کے شعبے میں سرمایہ کاری کو فروغ دینے کے لیے حکومت کی جانب سے بین الاقوامی فورمز کے انعقاد اور پالیسی اصلاحات کو ماہرین بھی مثبت پیش رفت قرار دیتے ہیں۔ تاہم عوام کی جانب سے یہ مطالبہ بھی سامنے آیا ہے کہ اعلانات کے بجائے زمینی سطح پر فوری عملی پیش رفت کی جائے تاکہ ملک معدنی وسائل کے ذریعے معاشی ترقی کے نئے مرحلے میں داخل ہو سکے۔