اسحاق ڈار اور ای سی او سیکریٹری جنرل کی ملاقات، علاقائی اقتصادی تعاون کو مضبوط بنانے پر اتفاق

اسلام آباد میں اقتصادی تعاون تنظیم (ای سی او) کی وزرا کونسل کے 30ویں اجلاس کے موقع پر نائب وزیراعظم اور وزیر خارجہ اسحاق ڈار نے ای سی او کے سیکریٹری جنرل ڈاکٹر اسد مجید خان سے اہم ملاقات کی۔ دفتر خارجہ کے ترجمان کے مطابق اس ملاقات میں علاقائی تعاون، اقتصادی روابط اور باہمی اقتصادی انضمام کو مضبوط بنانے پر اتفاق کیا گیا۔

ملاقات کے دوران اسحاق ڈار نے ای سی او خطے میں علاقائی تعاون، باہمی روابط اور اقتصادی انضمام کی اہمیت پر زور دیا۔ انہوں نے پاکستان کی زیر صدارت ای سی او کے لیے مقرر کردہ موضوع ’مضبوط اور مستحکم اقتصادی تعاون تنظیم کے لیے علاقائیت کا احیا‘ کے تحت پاکستان کی ترجیحات سے بھی آگاہ کیا۔

نائب وزیراعظم نے 2027 میں ای سی او سربراہی اجلاس کی میزبانی کے لیے پاکستان کے عزم کا اعادہ کیا۔ دوسری جانب ای سی او سیکریٹری جنرل ڈاکٹر اسد مجید خان نے وزرا کونسل کے 30ویں اجلاس کے بہترین انتظامات، مہمان نوازی اور مؤثر رابطہ کاری پر پاکستان کو سراہا اور آئندہ صدارت سنبھالنے پر مبارک باد بھی دی۔

ڈاکٹر اسد مجید خان نے علاقائی تعاون اور کثیرالجہتی اشتراک عمل کے فروغ کے لیے پاکستان کی کوششوں کو قابل تحسین قرار دیا۔ اسحاق ڈار نے ای سی او کے ایجنڈے کو آگے بڑھانے اور پاکستان کی صدارت کے دوران تنظیم کی ترجیحات کی حمایت پر سیکریٹریٹ کی کوششوں کو سراہا۔

ملاقات میں اس بات پر اتفاق کیا گیا کہ پاکستان کی صدارت کے دوران حکومت پاکستان اور ای سی او سیکریٹریٹ کے درمیان قریبی رابطہ کاری برقرار رکھی جائے گی تاکہ طے شدہ اقدامات پر مؤثر عمل درآمد اور علاقائی ترقی و خوش حالی کے مشترکہ اہداف کا حصول یقینی بنایا جا سکے۔

یاد رہے کہ ای سی او وزرا کونسل کے 30ویں اجلاس کی رپورٹس کو حتمی شکل دے دی گئی ہے اور اجلاس کے دوسرے روز ایرانی وزیر خارجہ بھی شرکت کریں گے۔ یہ اجلاس خطے کے ممالک کے درمیان تجارت، سرمایہ کاری اور رابطے کے فروغ کے حوالے سے اہم پیش رفت سمجھا جا رہا ہے۔