کراچی میں جنوری 2027 میں نیشنل ہاکی چیمپئن شپ، عبدالستار ایدھی اسٹیڈیم کی اپ گریڈیشن شروع

پاکستان ہاکی فیڈریشن کے زیر اہتمام نیشنل ہاکی چیمپئن شپ کا انعقاد جنوری 2027 میں کراچی کے تاریخی عبدالستار ایدھی ہاکی اسٹیڈیم میں کیا جائے گا۔ اس میگا ایونٹ میں ملک بھر کی صوبائی ٹیموں کے ساتھ ساتھ مختلف ڈیپارٹمنٹل ٹیمیں بھی ایکشن میں نظر آئیں گی، جس سے قومی ہاکی کو نئی توانائی ملنے کی امید ہے۔

فیڈریشن کے مطابق چیمپئن شپ کی شاندار میزبانی کو مدنظر رکھتے ہوئے عبدالستار ایدھی ہاکی اسٹیڈیم کی تزئین و آرائش اور اپ گریڈیشن کے کاموں کو ترجیحی بنیادوں پر مکمل کیا جا رہا ہے۔ اس اقدام کا مقصد ایونٹ میں شریک کھلاڑیوں، ٹیم آفیشلز اور ہاکی شائقین کو عالمی معیار کی جدید سہولیات فراہم کرنا ہے۔

اس سلسلے میں صدر پاکستان ہاکی فیڈریشن محی الدین احمد وانی نے گزشتہ ماہ اسٹیڈیم کا تفصیلی دورہ کیا تھا اور متعلقہ حکام کو ہدایت دی تھی کہ مرمت و اپ گریڈیشن کا عمل مقررہ وقت میں جلد از جلد مکمل کیا جائے تاکہ ایونٹ کی تیاریوں میں کوئی تاخیر نہ ہو۔

پی ایچ ایف ترجمان کے مطابق روشنیوں کے شہر کراچی میں قومی ہاکی چیمپئن شپ کے انعقاد اور اس تاریخی اسٹیڈیم کی بحالی سے نہ صرف مقامی سطح پر ہاکی سرگرمیوں کو نئی تقویت ملے گی بلکہ نوجوان کھلاڑیوں کو بھی اپنی صلاحیتوں کے جوہر دکھانے کا بھرپور موقع میسر آئے گا۔

قابل ذکر ہے کہ ملکی سطح پر ہاکی کے فروغ کے لیے کوششیں جاری ہیں اور اسپورٹس ڈپلوماسی کے تحت ایران نے بھی پاکستان کے ساتھ ہاکی کے فروغ کے لیے دلچسپی کا اظہار کیا ہے۔ نیشنل چیمپئن شپ کے انعقاد سے قومی کھلاڑیوں کو بین الاقوامی مقابلوں کے لیے تیاری کا بہتر پلیٹ فارم بھی دستیاب ہوگا۔