ماسکو میں کار بم دھماکا: روسی خاتون گرفتار، یوکرینی سابق وزیراعظم کے مشیر شدید زخمی
روس کے دارالحکومت ماسکو میں یوکرین کے سابق وزیراعظم کے مشیر کی گاڑی میں ہونے والے دھماکے کے سلسلے میں 21 سالہ روسی خاتون کو گرفتار کرلیا گیا ہے، جبکہ متاثرہ شخص شدید زخمی ہیں۔
یہ خبر اور ہر اہم خبر سب سے پہلے واٹس ایپ پر پائیںaround.pk اردو خبریں چینل — مفت، بغیر سپیم فالو کریں
روس کے دارالحکومت ماسکو میں یوکرین کے سابق وزیراعظم میکولا آزاروف کے مشیر سرگئی زاووروتنی کی گاڑی میں ہونے والے دھماکے کے سلسلے میں روسی حکام نے ایک 21 سالہ خاتون کو گرفتار کرلیا ہے۔ غیر ملکی خبر رساں ادارے کے مطابق یہ دھماکا 13 نومبر کو پیش آیا، جس کے نتیجے میں 72 سالہ زاووروتنی شدید زخمی ہوئے اور انہیں فوری طور پر قریبی اسپتال منتقل کیا گیا۔
روسی وفاقی سکیورٹی سروس (ایف ایس بی) کے مطابق گرفتار خاتون 2005 میں پیدا ہوئی اور اسے پیر کے روز حراست میں لیا گیا۔ تفتیشی حکام کا کہنا ہے کہ خاتون نے زاووروتنی کی گاڑی کے نیچے دھماکا خیز مواد نصب کیا تھا، جسے بعد ازاں دور سے دھماکے سے اڑا دیا گیا۔
حکام کے دعوے کے مطابق خاتون کو رواں برس جولائی سے ایک ایسے شخص نے اپنے جال میں پھنسایا جو خود کو روسی مرکزی بینک کا اہلکار ظاہر کرتا تھا۔ اسے بڑی رقم محفوظ کھاتوں میں منتقل کرنے پر مجبور کیا گیا اور بعد میں اسی ذریعے سے اس پر دباؤ ڈال کر حملے کے لیے استعمال کیا گیا۔ روسی حکام کا یہ بھی کہنا ہے کہ خاتون کو جولائی سے ایک جعلی کال سینٹر کے ذریعے ذہنی طور پر قابو میں رکھا جا رہا تھا۔
ایف ایس بی نے الزام عائد کیا ہے کہ یہ کارروائی یوکرین کے خفیہ اداروں کی ہدایت پر کی گئی، تاہم یوکرین کی جانب سے اس حوالے سے فوری طور پر کوئی ردعمل سامنے نہیں آیا۔ واضح رہے کہ میکولا آزاروف 2010 سے 2014 تک یوکرین کے وزیراعظم رہے تھے اور میدان انقلاب کے دوران روس چلے گئے تھے۔
یہ واقعہ روس میں دو روز کے دوران پیش آنے والا دوسرا کار دھماکا ہے۔ اس سے ایک روز قبل سینٹ پیٹرزبرگ میں گاڑی میں ہونے والے دھماکے میں ایک روسی فوجی اہلکار ہلاک ہوگیا تھا۔ روسی تحقیقاتی کمیٹی کے مطابق گرفتار خاتون کے خلاف مزید قانونی کارروائی جاری ہے۔
اب تک کی کہانی ماسکو
- دنانیر مبین نے ماسکو میں بہترین اداکارہ کا ایوارڈ جیت لیا
- یوکرین جنگ کے خاتمے کے لیے امریکی وفد کی ماسکو میں پیوٹن سے اہم ملاقات
- پیوٹن کا یوکرین جنگ کے حوالے سے سخت مؤقف برقرار، غیر ملکی امن فوج کی تعیناتی مسترد
- پیوٹن سے ایرانی سلامتی کونسل کے سربراہ کی ملاقات، مجتبیٰ خامنہ ای کا خط بھی حوالے









