امریکا کی یورپ کے دفاعی نظام میں روس کو شامل کرنے کی تجویز، یورپی ممالک میں تحفظات

امریکی صدر ڈونلڈ ٹرمپ کی انتظامیہ نے یوکرین جنگ کے بعد یورپ کے لیے نئے دفاعی اور سلامتی ڈھانچے میں روس کو بھی شامل کرنے کی تجویز پیش کی ہے، جس پر متعدد یورپی ممالک نے تحفظات کا اظہار کیا ہے۔ فرانسیسی اخبار کی رپورٹ کے مطابق ابوظبی میں امریکا، روس اور یوکرین کے درمیان ہونے والے مذاکرات میں یورپ کے مستقبل کے دفاعی نظام پر بھی بات چیت کی گئی۔

روسی مذاکراتی وفد نے امریکی تجویز کو ماسکو کے لیے مثبت پیش رفت قرار دیا، جبکہ روسی وزارت خارجہ نے بھی یورپی ممالک کو نئے دفاعی معاہدوں کی پیشکش کی۔ تاہم اس حوالے سے کوئی حتمی اتفاق رائے سامنے نہیں آیا اور معاملہ ابھی زیر بحث ہے۔

یورپی یونین کی خارجہ پالیسی کی سربراہ کایا کالاس نے امریکی تجویز پر ردعمل دیتے ہوئے کہا کہ یورپ کا اپنا سلامتی نظام پہلے سے موجود ہے اور اصل مسئلہ روس کا بین الاقوامی معاہدوں کی پابندی نہ کرنا ہے۔ جرمنی نے بھی ماسکو پر زور دیا ہے کہ وہ ماضی میں کیے گئے معاہدوں اور اپنی عالمی ذمہ داریوں کا احترام کرے۔

دوسری جانب 13 نومبر کو ڈبلن میں تقریباً 40 یورپی ممالک کے رہنماؤں نے واضح کیا کہ یورپ کی سلامتی اور مستقبل سے متعلق فیصلے یورپی ممالک کو اعتماد میں لیے بغیر نہیں کیے جا سکتے۔ یورپی ممالک کا مؤقف ہے کہ وہ روس کے ساتھ مذاکرات کے مخالف نہیں، تاہم کسی بھی نئے دفاعی انتظام میں یورپ کے تحفظات، یوکرین کی خودمختاری اور نیٹو کے اجتماعی دفاعی نظام کو نظرانداز نہیں کیا جا سکتا۔

ادھر یوکرینی صدر ولودومیر زیلنسکی نے خدشہ ظاہر کیا ہے کہ ماسکو وسیع تر سلامتی مذاکرات کو استعمال کرتے ہوئے یوکرین کے مستقبل سے جڑے بنیادی معاملات کو پس منظر میں دھکیل سکتا ہے۔ واضح رہے کہ یورپ کے نئے دفاعی ڈھانچے پر بات چیت کا سلسلہ جاری ہے اور ابھی تک کوئی حتمی فیصلہ سامنے نہیں آیا۔