کراچی میں ترقیاتی اسکیموں میں ردوبدل پر پابندی، میئر کا سخت حکم

کراچی کے میئر بیرسٹر مرتضیٰ وہاب نے شہر قائد میں جاری ترقیاتی اسکیموں میں کسی قسم کی ردوبدل پر مکمل پابندی عائد کر دی ہے۔ انہوں نے متعلقہ افسران کو ہدایت کی کہ تمام منصوبے منظور شدہ شیڈول اور مقررہ معیار کے مطابق بروقت مکمل کیے جائیں اور غیر ضروری تاخیر سے ہر صورت گریز کیا جائے۔ یہ ہدایات کے ایم سی ہیڈ آفس میں محکمہ انجینئرنگ کے ایک اہم اجلاس کے دوران جاری کی گئیں۔

اجلاس میں شہر کی 26 اہم شاہراہوں سمیت مختلف ترقیاتی اسکیموں اور مرکزی شاہراہوں کو آپس میں ملانے والی 140 سڑکوں پر جاری کام کی پیش رفت کا تفصیلی جائزہ لیا گیا۔ میونسپل کمشنر ابرار جعفر، فنانس ایڈوائزر گلزار ابڑو، ڈائریکٹر میڈیا دانیال سیال اور دیگر سینئر افسران نے شرکت کی، جبکہ ڈائریکٹر جنرل ٹیکنیکل سروسز طارق مغل نے منصوبوں کی پیش رفت، عمل درآمد اور تکمیل کی مقررہ مدت کے حوالے سے بریفنگ دی۔

میئر کراچی نے سست روی سے کام کرنے اور غیر معیاری تعمیراتی سامان استعمال کرنے کی شکایات کا سامنا کرنے والے ٹھیکیداروں کے خلاف سخت کارروائی کا بھی حکم دیا۔ انہوں نے میونسپل کمشنر کو ہدایت کی کہ ٹھیکیداروں کے خلاف موصولہ شکایات کی جامع تحقیقات کر کے سات روز کے اندر تفصیلی رپورٹ پیش کی جائے۔ انہوں نے واضح کیا کہ منصوبوں میں تاخیر اور غیر معیاری سامان کا استعمال کسی صورت برداشت نہیں کیا جائے گا۔

انہوں نے کہا کہ عوام کے ٹیکس کا پیسہ ذمہ داری کے ساتھ خرچ ہونا چاہیے اور ہر منصوبے سے شہریوں کو وہی معیار اور سہولیات ملنی چاہئیں جن کا وعدہ کیا گیا ہے۔ محکمہ انجینئرنگ کو ہدایت دی گئی کہ اہم شاہراہوں پر کام کی رفتار تیز کی جائے اور مرکزی شاہراہوں کو ملانے والی سڑکوں کی تعمیر و بحالی مزید تاخیر کے بغیر مکمل کی جائے۔

میئر کراچی نے جاری بیشتر ترقیاتی اسکیموں کی تکمیل کے لیے 15 روز کی ڈیڈ لائن مقرر کرتے ہوئے متعلقہ محکموں کو ہدایت کی کہ منصوبوں کی پیش رفت میں حائل تمام انتظامی اور عملی رکاوٹیں فوری دور کی جائیں۔ انہوں نے کہا کہ ترقیاتی منصوبے شہریوں کے لیے پریشانی کا باعث نہیں بننے چاہئیں، کیونکہ کراچی کے باشندوں نے شہر کی ترقی سے بہت سی توقعات وابستہ کر رکھی ہیں اور انتظامیہ کی ذمہ داری ہے کہ انہیں بنیادی ڈھانچے میں نمایاں بہتری کی صورت میں پورا کرے۔

ان کا کہنا تھا کہ ترقیاتی اسکیموں کا بنیادی مقصد شہریوں کو سہولت فراہم کرنا اور شہر کے انفرااسٹرکچر کو بہتر بنانا ہے، اس لیے غیر ضروری تاخیر اور بار بار منصوبوں میں ردوبدل کے ذریعے اس مقصد کو متاثر نہیں ہونے دیا جائے گا۔