جامعہ کراچی کے شعبہ کیمسٹری میں دو جدید لیبارٹریز قائم، 1973 المنائی کا بڑا منصوبہ
جامعہ کراچی کے شعبہ کیمسٹری میں 1973 المنائی کی کاوشوں سے دو جدید لیبارٹریز قائم کر دی گئیں، جن میں سے ایک شاہد احمد اور دوسری اُن کی اہلیہ مریم ایس ڈارسوٹ سے منسوب کی گئی ہیں۔
یہ خبر اور ہر اہم خبر سب سے پہلے واٹس ایپ پر پائیںaround.pk اردو خبریں چینل — مفت، بغیر سپیم فالو کریں
جامعہ کراچی کے شعبہ کیمسٹری میں 1973 المنائی (رجسٹرڈ) کی جانب سے دو جدید لیبارٹریز قائم کی گئی ہیں۔ ڈین فیکلٹی آف سائنس پروفیسر ڈاکٹر بلقیس گل نے اِن اِن آرگینک کیمسٹری لیبارٹری کا افتتاح کیا، جو شعبے کے 1973ء بیچ کے کامیاب طالب علم اور ممتاز سابق استاد شاہد احمد سے منسوب ہے، جب کہ اینالیٹیکل کیمسٹری لیبارٹری سابق طالبہ اور شاہد احمد کی اہلیہ مریم ایس ڈارسوٹ کے نام سے منسوب کی گئی۔
افتتاحی تقریب سے شعبہ کیمسٹری کی چیئرپرسن پروفیسر ڈاکٹر نسرین فاطمہ، بحرین یونیورسٹی کے پروفیسر ڈاکٹر سلیم اختر، ڈاکٹر محسن علی، محترمہ تسنیم الیاس اور پروفیسر اعجاز فاروقی نے خطاب کیا۔ اس موقع پر ڈائریکٹر اوورسیز 1973 المنائی ڈاکٹر التفات حسن اور سکواش کے سابق عالمی چیمپیئن جہانگیر خان کے ریکارڈ شدہ پیغامات بھی سنائے گئے، جب کہ المنائی کی فلاحی و ترقیاتی سرگرمیوں اور شعبے کی تاریخ پر مبنی دو ڈوکیومنٹریاں پیش کی گئیں۔
مقررین نے کہا کہ ذہین اور باصلاحیت طلبہ کو عملی زندگی میں وقتی مشکلات ضرور پیش آ سکتی ہیں، تاہم یہ رکاوٹیں اُنہیں ترقی کی راہ پر آگے بڑھنے سے نہیں روک سکتیں۔ اُن کا کہنا تھا کہ شعبہ کیمسٹری کے فارغ التحصیل طلبہ نے محنت اور لگن کا سلسلہ جاری رکھا اور آج امریکہ، کینیڈا سمیت دنیا کے مختلف ممالک میں اپنی صلاحیتوں کا لوہا منوا رہے ہیں۔
پروفیسر ڈاکٹر بلقیس گل نے اپنے کلیدی خطاب میں کہا کہ طلبہ کے بہتر مستقبل اور ادارے کی ترقی کے لیے سب کو اپنا کردار ادا کرنا چاہیے۔ اُنہوں نے کہا کہ جدید تقاضوں سے ہم آہنگ لیبارٹریز کا قیام خوش آئند اقدام ہے اور اب یہ طلبہ پر منحصر ہے کہ وہ اِن سہولیات سے کس حد تک استفادہ کرتے ہوئے اپنے شعبے، جامعہ اور ملک کا نام روشن کرتے ہیں۔
تقریب سے خطاب کرتے ہوئے ڈاکٹر التفات حسن نے اپنے ویڈیو پیغام میں کہا کہ اُن کا خواب ہے کہ کوئی طالب علم محض فیس ادا نہ کر سکنے کی وجہ سے تعلیم سے محروم نہ ہو۔ اُنہوں نے بتایا کہ المنائی نے 2024ء میں 10 بچوں، 2025ء میں 15 بچوں اور 2026ء میں 45 بچوں کی فیس ادا کی، جب کہ آئندہ سال مزید بچوں کی تعلیمی معاونت کا عزم کیا گیا ہے۔
تاریخی پس منظر کے مطابق امریکہ کے شہر شکاگو میں مقیم 1973ء بیچ کے ایک کلاس فیلو شاہد احمد نے اپنی مادرِعلمی کے لیے گراں قدر رقم کی پیشکش کی۔ 25 اپریل 2025ء کو شعبے کی ازسرنو بہتری کا منصوبہ بنایا گیا، 5 اگست 2025ء کو وائس چانسلر آفس میں مفاہمت کی یادداشت پر دستخط کیے گئے اور 9 ستمبر 2025ء کو ’عزمِ عالی شان‘ منصوبے کا آغاز ہوا۔ اِس منصوبے کے تحت شعبے کی دونوں عمارتوں کی مرمت، پانچ ہزار گیلن گنجائش کے زیرزمین ٹینک کی تعمیر، پانی، نکاسی، کیمیکلز اور گیس کی پائپ لائنوں کی تجدید، بجلی کی نئی وائرنگ، جدید سوئچ بورڈز، نئے باتھ رومز اور لیبارٹری فرنیچر کی مرمت کے علاوہ چین سے درآمد شدہ جدید لیبارٹری فرنیچر کی تنصیب بھی شامل ہے۔
اب تک کی کہانی تعلیم
- ایچ ای سی کا 44 جامعات میں کمپیوٹر سائنس داخلے بند رکھتے ہوئے نیا اسکل ٹیسٹ 2027 کا اعلان
- سندھ ہائیکورٹ: افغان طلبا کے ڈاؤ یونیورسٹی نوٹس کے خلاف حکم امتناع مئی 2027 تک
- اسلام آباد ہائی کورٹ: آوارہ کتوں کے خلاف کارروائی کا فیصلہ سی ڈی اے اور چیف کمشنر کے سپرد
- پنجاب کے 34 نجی میڈیکل کالجوں میں ایم بی بی ایس داخلے: یو ایچ ایس نے پہلی سلیکشن لسٹ جاری کر دی









