دانش اسکولوں میں اے آئی اور آئی ٹی پر مبنی تعلیم، وزیراعظم کی ہدایت
وزیراعظم شہباز شریف نے دانش اسکولوں کے معیار پر سمجھوتہ ناقابلِ قبول قرار دیتے ہوئے اے آئی اور آئی ٹی پر مبنی جدید طریقہ ہائے تدریس اپنانے کی ہدایت کی ہے۔
وزیراعظم شہباز شریف نے ملک بھر میں دانش اسکولوں کی تعمیر کی پیش رفت کے حوالے سے بذریعہ زوم آن لائن جائزہ اجلاس منعقد کیا، جس میں انہوں نے تعلیمی معیار کو اولین ترجیح قرار دیتے ہوئے کہا کہ دانش اسکولوں کے معیار پر کسی قسم کا سمجھوتہ قبول نہیں کیا جائے گا کیونکہ یہ اسکول ملک کے روشن مستقبل میں سرمایہ کاری کی حیثیت رکھتے ہیں۔
اجلاس میں وزیراعظم نے ہدایت کی کہ دانش اسکولوں میں طلبہ کی تعلیم و تربیت کے لیے مصنوعی ذہانت یعنی اے آئی اور انفارمیشن ٹیکنالوجی پر مبنی جدید طریقہ کار اپنایا جائے، جبکہ اسکولوں کے بنیادی ڈھانچے، سہولیات اور خدمات کے معیار کی جانچ کے لیے تھرڈ پارٹی ویلیڈیشن کو بھی یقینی بنایا جائے تاکہ تعلیمی معیار پر مکمل شفافیت قائم رہے۔
وزیراعظم نے اس عزم کا اعادہ کیا کہ دانش اسکولوں میں صرف انتہائی غریب اور مستحق گھرانوں کے بچوں کو میرٹ کی بنیاد پر داخلہ دیا جائے گا، اور ہمارے بچے ملک کا مستقبل ہیں۔ انہوں نے دانش اسکولوں کی بروقت تکمیل کے لیے تعمیراتی کام تیز کرنے اور تعمیراتی سرگرمیاں چوبیس گھنٹے جاری رکھنے کی بھی ہدایت کی۔
اجلاس میں وزیراعظم کو گلگت بلتستان، آزاد جموں و کشمیر، سندھ اور بلوچستان میں دانش اسکولوں کی تعمیر کی پیش رفت پر تفصیلی بریفنگ دی گئی۔ وزیراعظم نے وزارت مواصلات کو ہدایت کی کہ گلگت بلتستان اور آزاد جموں و کشمیر میں دانش اسکولوں تک آسان رسائی کے لیے بہترین سڑکوں کا نظام قائم کیا جائے تاکہ دور دراز علاقوں کے طلبہ کو بھی تعلیم کی سہولت میسر آ سکے۔
وزیراعظم نے مزید کہا کہ خیبر پختونخوا کے ضم شدہ اضلاع یعنی سابق فاٹا میں دانش اسکولوں کی تعمیر کے لیے حکمت عملی جلد از جلد پیش کی جائے۔ اجلاس میں وفاقی وزرا احسن اقبال، احد خان چیمہ، عطا اللہ تارڑ، شزا فاطمہ خواجہ، ڈاکٹر مصدق مسعود ملک اور متعلقہ اداروں کے اعلیٰ افسران نے شرکت کی۔
واضح رہے کہ دانش اسکول منصوبہ پاکستان بھر میں معیاری تعلیم کو غریب اور مستحق طبقات تک پہنچانے کے لیے حکومت کا اہم اقدام ہے، جس میں جدید ٹیکنالوجی کے استعمال سے تعلیمی نظام کو مزید مؤثر بنانے پر زور دیا جا رہا ہے۔
